U Zasłaŭi tratuary pieratvarylisia ŭ koŭzanku. Kamunalniki razvodziać rukami
Na minułym tydni nadvorje ŭ Biełarusi rezka pamianiałasia: adliha z mokrym śnieham chutka sastupiła miesca mocnym marazam. U vyniku darohi i asabliva tratuary ŭ Zasłaŭi pakrylisia sucelnym lodam. Žychary pačali skardzicca, što pa niekatorych vulicach amal niemahčyma biaśpiečna chadzić. Ludziej cikavić, čamu lod nie zrazajuć technikaj i čamu amal nie vidać supraćhałalodnych srodkaŭ, piša hazieta «Prystaličča».
Žurnalisty naviedali niekalki prablemnych miescaŭ. Asabliva niebiaśpiečna kala čyhunačnaha vakzała z boku vulicy Zialonaj, dzie daroha pieratvaryłasia ŭ ślizki spusk. Na vulicy Dziaržynskaha i ŭzdoŭž tratuara z boku vulicy Uschodniaj chadzić praktyčna niemahčyma — častka ludziej vymušanaja vychodzić na prajeznuju častku, što stvaraje ryzyku trapić pad aŭtamabil.
Tratuary pakrytyja ščylnaj ledzianoj skarynkaj, jakaja ŭtvaryłasia paśla zamiarzańnia vilhaci. Navat tam, dzie raniej rabili pasypku, pamahło heta słaba.
U «Minrajharramaŭtadary» patłumačyli, što prablema nie ŭ adsutnaści apracoŭki, a ŭ składanych umovach nadvorja.
Paśla daždžoŭ i adlihi vada zamierzła pry tempieratury da -17°C, utvaryŭšy manalitny lod. Pry takich marazach sol amal nie dziejničaje, tamu ciapier vykarystoŭvajuć piasok, kab stvaryć šurpataść. Adnak hety sposab mienš efiektyŭny.
Aktyŭnaja baraćba z hałalodam stanie mahčymaj, kali tempieratura pavysicca i reahienty znoŭ pačnuć pracavać.
Što da miechaničnaha zrazańnia lodu, to ciažkaja technika moža paškodzić pakryćcio tratuaraŭ i zrabić situacyju jašče bolš niebiaśpiečnaj. Darožnyja słužby adznačajuć, što pracujuć u ŭzmocnienym režymie: asnoŭnyja siły nakiravanyja na hałoŭnyja mahistrali, a technika častkova zadziejničanaja i ŭ inšych nasielenych punktach rajona.
Śpiecyjalisty pryznajuć, što situacyja składanaja, i prosiać žycharoŭ być aściarožnymi, pakul nadvorje nie stanie bolš spryjalnym. Piešachodam rajać nasić abutak ź niaślizkaj padešvaj i być maksimalna ŭvažlivymi.
Ciapier čytajuć
Pamierła palitźniavolenaja Alena Pankova. Paŭhoda nazad jaje asudzili za ŭdzieł u pratestach7
Kamientary