Duš abo vanna? Navukoŭcy vyvučali, što lepš dla zdaroŭja
I zaadno — jak časta treba myć dyvanki kala vanny abo duša.
Što lepš dla hihijeny — duš abo vanna? Vydańnie Daily Mail źviarnułasia pa adkaz da kliničnaha mikrabijołaha z Univiersiteta Lestera Prymroŭz Frystoŭn (Primrose Freestone).
Pa słovach navukoŭcy, duš — bolš efiektyŭny sposab ačyščeńnia. Asnoŭnaja pryčyna ŭ tym, što ŭ vańnie vada nie źmianiajecca, i ŭsie mikraarhanizmy, jakija byli na ciele, prosta pieraraźmiarkoŭvajucca pa roznych učastkach skury.
Bieśpierapynny patok vady ŭ dušy nie tolki zmyvaje brud, pot i tłušč, ale i źlohku masažuje skuru.
Taksama, pa słovach ekśpiertki, ranišni duš dapamahaje pračnucca, zmyć pot ci bakteryi, jakija vy mahli padchapić z paścielnaj bializny padčas snu. Heta asabliva karysna, kali vaša bializna była nie samaj śviežaj, kali vy kłalisia ŭ łožak.
Adnak Frystoŭn nie zaklikaje całkam admaŭlacca ad vanny, bo jana maje svaje pieravahi dla zdaroŭja. Haračaja vada dapamahaje źniać napružańnie ŭ myšcach, supakoić niervovuju sistemu i palepšyć krovazvarot.
Kab spałučyć pryjemnaje z karysnym, ekśpierty rajać prysłuchacca da dośviedu tych, chto vykarystoŭvaje kambinavany mietad: spačatku prymać vannu dla rełaksacyi, a paśla abaviazkova spałoskvacca pad dušam.
Taki padychod dazvalaje atrymać maksimalnuju karyść dla psichičnaha stanu i adnačasova zmyć reštki myła i mikrobaŭ, jakija mahli zastacca na skury.
Cikava, što častkovaja ačystka ad bakteryj paśla vanny adbyvajecca i padčas vycirańnia ručnikom, ale tut toicca inšaja niebiaśpieka. Doktar Frystoŭn papiaredžvaje, što kali nie prać ručnik rehularna, na im chutka ŭtvoracca cełyja kałonii bakteryj.
Akramia taho, niebiaśpieka moža chavacca i ŭ inšych rečach u vannym pakoi. Naprykład, vilhotnyja dyvanki kala vanny abo duša lohka nazapašvajuć bakteryi i ćvil, asabliva kali doŭha nie vysychajuć. Ekśpierty rajać dobra prasušvać ich paśla vykarystańnia i myć nie radziej za raz na tydzień pry vysokaj tempieratury.
Kamientary