«Nibyta drony źbivali». U vioscy na poŭdni Biełarusi havorać pra dziŭnuju aktyŭnaść kala «vajskovaj vyški»
Biełaruskija retranślatary kala miažy ŭžo niekalki tydniaŭ milhajuć u zahałoŭkach. Hałoŭnakamandujučy Uzbrojenymi siłami Ukrainy Alaksandr Syrski 30 červienia zajaviŭ, što paśla poŭnaha adklučeńnia adzin retranślatar usio ž taki ŭklučaŭsia. Ale vykazaŭ upeŭnienaść, što bolš heta nie paŭtorycca. Jak daviedałasia «Lusterka», žychary adnoj ź viosak na poŭdni krainy dva dni čuli štości padobnaje na vybuchi.
Što za apošni retranślatar, jaki «bolš nie buduć uklučać»
Hałoŭkam USU Alaksandr Syrski zajaviŭ u intervju, što ŭkrainskija vajskoŭcy zafiksavali ŭ Biełarusi pracu adnaho z retranślataraŭ 29 červienia. Pavodle jaho infarmacyi, retranślatary na terytoryi Biełarusi jašče nie demantavanyja.
— Ja dumaju, što jany bolš nie buduć ich uklučać, — skazaŭ hałoŭkam USU.
— U ich fizična heta nie atrymajecca? — udakładniŭ žurnalist.
— Nu ja ž nie mahu vam usio raskazvać. Ja dumaju, što jany zrazumiejuć, što takoha nie varta rabić. Skažam tak, — zajaviŭ Syrski.
Jon nie skazaŭ, na čym hruntujecca jaho ŭpeŭnienaść. Ci było niejkaje fizičnaje ŭździejańnie? Ci vajskoŭcy znajšli sposab adklučyć retranślatar dystancyjna? A moža, dva baki damovilisia? Va USU admovilisia ŭdakładnić hety momant. Pasoł MZS Ukrainy pa asablivych daručeńniach nie zmoh ni paćvierdzić, ni abvierhnuć viersiju pra mahčymy ŭdar.
«Nibyta drony źbivali»
Błohier Pavieł Anuška 1 lipienia nazvaŭ kankretnuju łakacyju — vioska Parečča Pinskaha rajona, jakaja raźmieščana prykładna za 35 kiłamietraŭ ad miažy z Ukrainaj. Pavodle słoŭ błohiera, u hetaj vioscy «byŭ źniščany» retranślatar. Praŭda, jon nie ŭdakładniŭ, adkul atrymaŭ hetuju infarmacyju. Miarkujučy pa publikacyjach, sam jon nie znachodzicca ŭ tych krajach.
Žurnalistka «Lusterka» jak zaniepakojenaja hramadzianka źviarnułasia ŭ filijał adnoj ź dziaržarhanizacyj u vioscy Parečča.
«Heta ŭčora było. I pazaŭčora. Nibyta drony źbivali, — raskazała supracoŭnica, jakaja adkazała na zvanok. — U nas tam vyška staić vajskovaja, kala kałhasnaha dvara, kali viedajecie. Voś jany i źbivali. Učora try razy, i pazaŭčora try razy było takoje, nibyta jak vybuch. Nu tam jany, vajskoŭcy, napeŭna, nu… bačać ža heta ŭsio».
Na momant zvanka — 2 lipienia — pavodle jaje słoŭ, situacyja naładziłasia.
«Užo ŭsio supakoiłasia, siońnia ničoha nie było. Spakojna ŭsio, ludzi chodziać i na poštu, i ŭ kramu, usiudy», — zapeŭniła surazmoŭca.
«Jość vyška, staić»
Taksama žurnalistka źviarnułasia ŭ miascovy vykankam jak mama, jakuju chvaluje pytańnie: ci niebiaśpiečna adpraŭlać dzicia ŭ letni łahier u Parečča?
«Nu, niebiaśpieki niama nijakaj, — pastaralisia supakoić tam. — Nam aficyjnaja infarmacyja taksama nie pastupała. Jość vyška, staić… Štości niezrazumiełaje było, ale aficyjnaj infarmacyi niama nijakaj. I jana ŭ addalenaści znachodzicca ad hetaha dziciačaha łahiera, heta vyška. To-bok zusim navat nie ŭ tym kancy. Tamu ja dumaju, što chvalavacca nie varta».
Miarkujučy pa danych kartahrafičnych servisaŭ, u Pareččy jość bazavaja stancyja dziaržaŭnaha pravajdara beCloud, jakaja znachodzicca trochi na poŭdzień ad samoj vioski. Na anłajn-kartach pabudova vyhladaje jak vyška. Miarkujučy pa histaryčnych zdymkach, jana źjaviłasia pamiž 2017 i 2019 hadami.
Niepadalok raźmieščana sielhaspradpryjemstva. Možna vykazać zdahadku, što mienavita jaho surazmoŭca nazyvała «kałhasnym dvarom».
Papiaredžańnie Zialenskaha
19 červienia prezident Ukrainy Uładzimir Zialenski zajaviŭ, što Minsku varta demantavać retranślatary, jakija, pa śćviardžeńni Kijeva, dapamahajuć Rasii karektavać udary bieśpiłotnikaŭ pa terytoryi Ukrainy.
Paźniej Zialenski paviedamiŭ, što Ukraina viedaje pra čatyry takija abjekty ŭ Bresckaj i Homielskaj abłaściach, i daŭ tydzień na ich demantaž, papiaredziŭšy, što ŭ advarotnym vypadku Ukraina moža likvidavać hetyja abjekty samastojna.
24 červienia Uładzimir Zialenski zajaviŭ, što, zhodna z dakładam hałaŭkama USU i raźviedki, retranślatary spynili pracu na terytoryi Biełarusi z 22 červienia.
Paśla ŭltymatumu Zialenskaha retranślatary adklučyli? Apošnija dni rasijskija bieśpiłotniki nie nakiroŭvajucca ŭzdoŭž biełaruska-ŭkrainskaj miažy
Jakija retranślatary na miažy maje na ŭvazie Ukraina?
«Toje, što jany robiać, heta i adpaviadaje intaresam». Paźniak pachvaliŭ Łukašenku ŭ situacyi z ultymatumam Zialenskaha
«Spačatku pahrozu prydumaŭ, potym sam jaje pieramoh». Prapahanda abviarhaje Zialenskaha, śćviardžaje, što retranślataraŭ nie zdymali, bo ich nie było
Ciapier čytajuć
Biełarus palacieŭ u Nicu praz Stambuł — ciapier jon u komie ŭ francuzskaj balnicy. Miascovyja miedyki rajać adklučać jaho4
Kamientary