Rasija moža rychtavać uzbrojenuju pravakacyju i suprać Polščy — Onet
Scenaroŭ moža być niekalki. Adzin ź ich — z udziełam biełaruskich sałdat.
ZŠA papiaredzili Polšču, što Rasija płanuje suprać jaje ŭzbrojenuju pravakacyju. Metaj rasijskaj pravakacyi moža być eskałacyja napružanaści i prymus zachodnich sajuźnikaŭ da prypynieńnia dapamohi Ukrainie. Jana moža być ździejśniena na praciahu niekalkich miesiacaŭ, paviedamili krynicy, blizkija da prezidenta Polščy Karala Naŭrockaha, śćviardžaje kałumnist polskaha vydańnia Onet Vitald Juraš.
Scenaryi pravakacyj mohuć uklučać ataku dronaŭ na abjekty krytyčnaj infrastruktury, takija jak elektrastancyi, abo simulacyju pavietranych udaraŭ, što vymusić Polšču aktyvavać svaje sistemy supraćpavietranaj abarony.
Adna z krynic u polskaj raźviedcy adznačyła, što pry samym ekstremalnym scenaryi moža adbycca hibrydnaja ataka ŭ prymiežnym rehijonie ci ŭzbrojenaje ŭvarvańnie z udziełam rasijskich abo biełaruskich sałdat.
Rasija mahła b pradstavić heta jak vypadkovy zachod na polskuju terytoryju z-za zboju GPS abo jak sumnieŭnuju vyratavalnuju misiju pa evakuacyi viertalota, jaki atrymaŭ niaspraŭnaść.
U takoj situacyi Rasija budzie raźličvać na toje, što zamiest adkryćcia ahniu pa rasijskich ci biełaruskich sałdatach, ZŠA prymusiać Polšču vieści pieramovy z Rasijaj ci Biełaruśsiu, a nie adkazvać siłaj.
Spynieńnie zachodniaj padtrymki Ukrainy mahło b navat stać hałoŭnym patrabavańniem Rasii na takich pieramovach u abmien na vyvad vojskaŭ z Polščy.
Naziemnaja ataka z boku Rasii moža być arhanizavana albo z Kalininhrada albo ź Biełarusi.
Pradstaŭnik kiraŭnictva ministerstva abarony Polščy paćvierdziŭ Onet mahčymaść rasijskaj pravakacyi, ale adznačyŭ, što Polšča ŭžo praviała vučeńni, nakiravanyja na toje, kab papiaredzić Maskvu ab sakrušalnym adkazie NATO.
Krynicy Onet padkreślili, što lubaja rasijskaja pravakacyja nie budzie nahadvać kłasičnuju abo kanviencyjnuju vajnu, i što Maskva jašče nie pryniała kančatkovaha rašeńnia nakont jaje praviadzieńnia.
Ciapier čytajuć
U rasijskaj armii biełaruskaha najomnika paviesili na drevie ŭniz hałavoj i bili pałkaj pa hienitalijach14
Kamientary