Суботняя сустрэча Аляксандр Лукашэнкі ў СІЗА КДБ з палітвязнямі, у тым ліку з Віктарам і Эдуардам Бабарыкамі, Ліліяй Уласавай, паліттэхнолагам Віталём Шкляравым дагэтуль у цэнтры ўвагі. У панядзелак раніцай адвакат Віталя Шклярава Антон Гашынскі сустрэўся са сваім падабаронным і распавёў Tut.by пра яго ўражанні.
— Такога ніколі яшчэ не было, каб кіраўнік краіны прыехаў размаўляць са зняволенымі, якіх прызнаюць палітычнымі. Я не ведаю такога, каб Пуцін ці Трамп рабілі нешта падобнае.
Я ўбачыў сёння Віталя — яго Лукашэнка запрасіў на размову разам з Ціханоўскім і Бабарыкам, якіх Віталь на гэтай сустрэчы ўбачыў упершыню. Яны правялі пяць гадзін — размаўлялі аб будучыні Беларусі, пратэстах і канстытуцыйнай рэформе, — распавёў Гашынскі.
Пасля сустрэчы, ужо пры развітанні, калі Віталь ціснуў руку Лукашэнку, ён паскардзіўся, што даўно не быў у лазні.
— Тады Лукашэнка сказаў аднаму са сваіх ахоўнікаў: «Дзіма, арганізуй». Дзе дакладна ў лазні яны былі, Віталь не ведае, але іх усіх адвезлі ў лазню без канвою. Далі магчымасць спакойна памыцца і пагутарыць паміж сабой. Я бачыў сёння Віталя літаральна некалькі хвілін, але ясна, што ўсё, што адбылося, было вялікай нечаканасцю для яго — ён не чакаў, што размова будзе — як ён выказаўся — настолькі адкрытай і будзе магчымасць паспрачацца з прэзідэнтам тварам у твар. Віталь кажа, што гэта першыя чалавечыя выходныя за тры месяцы.
Гашынскі лічыць, што па палітычных зняволеных ужо прынята рашэнне.
— Здаецца, што гэтая сустрэча — пачатак дыялогу, пазітыўны знак. Але рух далей неабходны, спыняцца і спачываць на лаўрах рана, — рэзюмаваў адвакат.
На сустрэчы ў суботу прысутнічалі Віктар і Эдуард Бабарыка, юрыст, член Каардынацыйнай рады Лілія Уласава, бізнэсовец Юры Васкрасенскі, паліттэхнолаг Віталь Шкляраў. На сустрэчы таксама былі Кірыл Бадзей, які да арышту займаў пазіцыю в. а. старшыні праўлення Белгазпрамбанка, а таксама дырэктар IT-кампаніі PandaDoc Дзмітрый Рабцэвіч, юрысты Максім Знак і Ілля Салей. Рабцэвічу і Васкрасенскаму ў суботу змянілі меру стрымання.
У сюжэтах, якія выйшлі на дзяржТБ, а таксама ў тэлеграм-канале «Пул першага», паказалі буйным планам амаль усіх удзельнікаў сустрэчы, у кадры толькі немагчыма апазнаць мужчыну ў цёмнай кепцы, які сядзіць паміж юрыстамі Знакам і Салеем. Не выключана, што гэта і быў Сяргей Ціханоўскі.
За сталом знаходзілася як мінімум 12 чалавек акрамя Лукашэнкі.
Цяпер чытаюць
Максім Знак: Мы з Ціханоўскай зайшлі падаваць скаргу ў кабінет Ярмошынай — але Ярмошынай там не было36
Каментары