«Бог прамаўляе з намі праз свае знакі»: арцыбіскуп Тадэвуш Кандрусевіч эмацыйна выказаўся пра пажар у Будславе
11 мая, даведаўшыся пра пажар у Нацыянальным санктуарыі, беларускія іерархі адразу скіраваліся ў Будслаў. Біскупы былі апошнімі, каму пажарныя дазволілі ненадоўга ўвайсці ў святыню.
Будслаў наведалі Старшыня Канферэнцыі Каталіцкіх Біскупаў у Беларусі біскуп Віцебскі Алег Буткевіч, арцыбіскуп Тадэвуш Кандрусевіч, біскуп Казімір Велікаселец, біскуп Юрый Касабуцкі і біскуп Аляксандр Яшэўскі.
«Раніцай даведаўся і быў у шоку, — адзначыў арцыбіскуп Тадэвуш Кандрусевіч у размове з Catholic.by. —
Мы адразу з біскупамі вырушылі ў Будслаў. Пад’язджаем да месца, з якога адкрываецца від на касцёл, і бачым, што даху ўжо няма, а над святыняй падымаецца дым».
«У касцёле ўнутры стаіць возера. Я быў там. Дымка, вада… Пажарныя робяць сваю справу…» — падзяліўся ўбачаным іерарх.
Па словах арцыбіскупа Кандрусевіча, «гэта вельмі вялікая трагедыя» як для Касцёла ў Беларусі, так і для краіны, бо нацыянальны санктуарый у Будславе з’яўляецца гісторыка-культурнай каштоўнасцю, а будслаўскі фэст унесены UNESCO ў Рэпрэзентацыйны спіс нематэрыяльнай культурнай спадчыны чалавецтва.
«Бог прамаўляе да нас праз розныя падзеі, праз свае знакі. Сёння наша краіна знаходзіцца ў вельмі вялікім крызісе. І гэта не толькі грамадска-палітычны, але і маральны крызіс. Гэтае сумнае здарэнне — заклік Бога да таго, каб мы асэнсавалі сваё жыццё з пункту гледжання маральнага закону, духу Евангелля, і стараліся ўпарадкаваць сваё жыццё праз малітву, пакаянне, прабачэнне і імкненне да міру ў нашым грамадстве», — сцвердзіў іерарх.
«Калі згарэў Нотр-Дам у Парыжы, Францыя стала на калені. Перад абліччам будслаўскай трагедыі станем і мы на калені, перапросім Бога за нашы асабістыя грахі і грахі нашага народа, паяднаемся адно з адным. Мы розныя, але мы — адзін беларускі народ», — працягваў арцыбіскуп.
Іерарх таксама падкрэсліў, што адбудова санктуарыя і яго рэстаўрацыя павінны стаць супольнай справай: «Сёння нам усім трэба ўзяць адказнасць на сябе за адбудову святыні. Маці Божая Будслаўская заслугоўвае мець годнае месца, дзе беларускі народ і надалей будзе ўшаноўваць Яе.
Наша Апякунка, узглянь міласціва на свой народ, як Ты гэта рабіла ў часы шматлікіх выпрабаванняў на працягу апошніх 400 гадоў і асабліва ў час атэістычных ганенняў. Дапамагай нам і сёння, у час новага выпрабавання», — памаліўся іерарх, са слязьмі на вачах гледзячы на апаленую будслаўскую базыліку.
Каментары