«Я не думаю, што ў Расіі атрымаецца лепш». NASAMS: што за ракетныя комплексы атрымае Украіна ад амерыканцаў?

Перадача гэтых комплексаў — вялікая падзея, піша ваенны гісторык Крыс Оўэн, які падзяліўся асаблівасцямі працы комплексу.

Нарвежскі ўдасканалены ракетны комплекс класа «зямля-паветра» (NASAMS) спалучае ў сабе пускавыя ўстаноўкі і сістэмы кіравання нарвежскай вытворчасці з амерыканскімі ўдасканаленымі ракетамі класа «паветра-паветра» сярэдняй далёкасці AIM-120 (AMRAAMs). Агульны кошт адной сістэмы складае 64 мільёны долараў.

Комплекс складаецца з трох батарэяў па тры пускавыя комплексы, а ўсе 54 ракеты з кожнага комплексу могуць быць выпушчаныя па розных цэлях на працягу 12 секунд. Комплекс можа атакаваць да 72 цэляў адначасова.

Павялічыць

NASAMS моцна адрозніваецца ад старых ЗРК тым, што размяркоўвае ўстаноўкі па шырокай тэрыторыі з дапамогай дэцэнтралізаванай сістэмы кіравання. Комплекс цяжка знайсці, а нават калі адзін элемент пашкоджаны, астатнія часткі ўсё яшчэ працуюць.

Да прыкладу, калі канадскія знішчальнікі F-18 сутыкнуліся з NASAMS на вучэннях 1999 года, яны не змаглі знайсці аніводнай батарэі, у той час як NASAMS здолелі знішчыць 18 самалётаў. «Я не думаю, што ў Расіі атрымаецца лепш», — піша Крыс.

Вайсковы эксперт Томас Тэйнер адзначае, што дзякуючы ўніверсальнаму фармату ракет AIM-120 НАТА здолее пастаўляць ракеты Украіне ў большых колькасцях. Толькі цяпер Альянс мае больш за 10 тысяч ракет і можа вырабляць не менш за 800 штогод.

Ракета AIM-120 мае дасканалую радыёлакацыйную галоўку саманавядзення, якая мае высокі ўзровень процідзеяння сродкам радыёэлектроннай барацьбы, можа здзяйсняць манеўры з высокімі перагрузкамі і разганяецца да 5 тысячаў кіламетраў у гадзіну.

Вельмі важнай асаблівасцю комплексу з'яўляецца тое, што ён фактычна мае адкрытую архітэктуру. У яго інтэгруюцца і іншыя сродкі выяўлення праціўніка, такія як станцыі радыётэхнічнай разведкі ды оптыка-прыцэльныя станцыі з тэлевізійным каналам, што дазваляе весці агонь у рэжыме поўнай маскіроўкі. А сам комплекс інтэгруецца ў больш шырокую сістэму супрацьпаветранай і супрацьракетнай абароны стандарту НАТА.

Дзякуючы NASAMS магчыма не толькі надзейна прыкрыць важныя аб'екты і гарады ад удару авіяцыі, але і знішчаць крылатыя ракеты. Яны могуць таксама знішчаць балістычныя ракеты, такія як «Іскандэр» і «Точка-У», што вельмі важна для Украіны.

Эксперты пакуль не маюць адказу на два важныя пытанні — колькі комплексаў будзе пастаўлена ва Украіну і калі. Бо стварэнне такога комплексу патрабуе часу, а некаторыя краіны Еўропы ўсё яшчэ чакаюць паставак, запланаваных на 2022—2023 гады (яны спадзяюцца, што ЗША угаворыць іх «пасунуцца» ў чарзе).

Украінскае выданне Defence Express адзначае, што NASAMS — найлепшы і самы прагматычны варыянт з усіх магчымых. Комплекс распрацоўваўся па схеме «найменшы кошт — найлепшая якасць», таму ён выкарыстоўвае вельмі распаўсюджаныя тэхналогіі і боепрыпасы. Да прыкладу, амерыканскія батарэі Patriot, хоць і маюць лепшыя якасці, але каштуюць амаль у 10 разоў даражэй.

Але калі Украіна будзе мець на ўзбраенні актуальныя зенітна-ракетныя комплексы, то гэта стане вялікай перавагай для ўсёй украінскай сістэмы супрацьпаветранай і супрацьракетнай абароны. Бо самыя новыя сістэмы СПА «Бук», якія цяпер стаяць на ўзбраенні УСУ, вырабленыя каля 30 гадоў таму.

• 151
• 0
• 7
• 4
• 4
• 2
• 6
• 0