Пад Гроднам забілі сабаку, які паўгода чакаў гаспадароў на аўтазапраўцы
Амаль паўгода на аўтазапраўцы ў Гродзенскім раёне дварняк Дызель чакаў сваіх гаспадароў, якія, па версіі валанцёраў, ад яго пазбавіліся. Урэшце ім занялася служба па адлове безнаглядных жывёл, піша Блог Гродна.
Мянушку Дызель адзінокаму дварняку далі неабыякавыя людзі, якія яго кармілі і спрабавалі знайсці яму новае жытло. На аўтазапраўцы пад Гродна сабака з'явіўся ў сакавіку гэтага года. Па якой прычыне, дакладнай інфармацыі няма ні ў каго. Але валанцёры і супрацоўнікі запраўкі лічаць, што сабаку вывезлі і пакінулі тут гаспадары.
Мясцовыя работнікі спрабавалі знайсці Дызелю хоць бы часовае жыллё. Аднойчы сабаку ўзяла пажылая пара, якая жыла ў суседняй вёсцы. Але Дызель зрабіў падкоп і вярнуўся на аўтазапраўку далей чакаць свайго гаспадара.
«Яго палюбілі і мясцовыя, і кліенты. Пастаянна частавалі яго чымсьці смачным. Дызеля нават дзеці кармілі з рук. Гэта быў вельмі добры і ласкавы сабака», — расказваюць валанцёры.
Потым сабаку знайшлі ператрымку ў Гродне, але сабака рашуча адмаўляўся ісці ў машыну.
«Дызеля забілі 14 верасня. Прыехала служба адлову Скідзельскага ЖКГ і стрэліла ў яго забойчую дозу снатворнага. У гэты час сабака ціхенька спаў на сонейку, — гавораць валанцёры. — Цела забралі і пахавалі на мясцовым палігоне».
Валанцёры перакананыя — служба адлову парушыла заканадаўства:
«Мы знайшлі нарматыўныя дакументы, у якіх пазначана, што адстрэл безнаглядных жывёл магчымы толькі ў «выключных выпадках па рашэнні мясцовых выканаўчых і распарадчых органаў».
Дызель нікому не перашкаджаў, ні на каго не кідаўся. Ён проста чакаў сваіх гаспадароў. А яго забілі на вачах у людзей».
У адказ на гэта валанцёры напісалі заяву ў міліцыю. Яны просяць правесці службовую праверку і даць ацэнку дзеянням службы адлову.
Цяпер чытаюць
Што азначае з’яўленне выхадцаў з Беларусі ў расійскім спецпадраздзяленні для асабліва важных аперацый і тайных забойстваў?18
Каментары