Расіяне ўдарылі па парку ў Харкаўскай вобласці. Пяцёра загінулых, у тым ліку немаўля ў вазку
Расійскі беспілотнік ударыў па цэнтральным парку гарадскога пасёлка Новая Вадалага ў Харкаўскай вобласці Украіны. Атака адбылася сярод белага дня, калі ў парку было шмат людзей, у тым ліку сем’яў з дзецьмі, паведамляе Украінская служба Бі-бі-сі.
Першапачаткова ратавальнікі паведамілі пра гібель дзвюх жанчын і немаўляці, якое знаходзілася ў дзіцячым вазочку. Яшчэ 14 чалавек атрымалі раненні, сярод іх было сямёра дзяцей.
Пазней кіраўнік Харкаўскай абласной вайсковай адміністрацыі Алег Сінегубаў паведаміў, што колькасць загінулых павялічылася да шасці чалавек, у тым ліку трох дзяцей, а пацярпелых — да 15-ці. Аднак пазней Нацыянальная паліцыя паведаміла пра пяць загінулых: трох жанчын і дзвюх дзяўчынак.
Прэзідэнт Украіны Уладзімір Зяленскі паведаміў, што загінула дзяўчынка Ангеліна, якой было крыху больш за год. Яна нарадзілася ў жніўні 2025 года. Яе маці Іна таксама памерла ў бальніцы. Другой загінулай дзяўчынцы было 11 гадоў.
У выніку ўдару пацярпеў будынак кавярні ў парку. На месца здарэння прыбылі экстранныя службы, параненых брыгады рэанімацыі дастаўлялі ў бальніцы Харкава. У Дзяржаўнай службе Украіны па надзвычайных сітуацыях назвалі атаку чарговым расійскім ударам па мірных жыхарах і падкрэслілі, што напад на дзяцей не меў ніякага ваеннага сэнсу.
Па словах Алега Сінягубава, за суткі расійскія войскі атакавалі 17 населеных пунктаў Харкаўскай вобласці і сам Харкаў. Больш за дзесяць чалавек атрымалі раненні, у тым ліку двое дзяцей. Пад ударам апынуліся як крытычная, так і цывільная інфраструктура. За папярэдні тыдзень сілы супрацьпаветранай абароны збілі над Харкавам і вобласцю больш за 700 паветраных цэляў.
Расія працягвала атакаваць і іншыя ўкраінскія гарады. У ноч на 19 кастрычніка ў выніку балістычнага ўдару па Кіеве загінула 21‑гадовая дзяўчына, былі параненыя людзі. Яшчэ адзін чалавек загінуў у Ірпені Кіеўскай вобласці, дзе таксама зафіксавалі значныя разбурэнні. Два чалавекі загінулі ў выніку ўдару па Крывым Розе.
Раніцай 19 кастрычніка Расія таксама атакавала Львоў і Івана-Франкоўск рэактыўнымі беспілотнікамі тыпу «Шахед».
Цяпер чытаюць
«Людзі каментавалі, што сальманела ўвайшла ў чат». Беларус паехаў працаваць у Крэмніевую даліну — і стаў кулінарным блогерам на 28 мільярдаў праглядаў1010
Каментары