Кітайскі спадарожнік, імаверна, зрабіў серыю лазерных стрэлаў над Гаваямі
Інцыдэнт зафіксаваў японскі тэлескоп.
Уначы 28 студзеня ў небе над Гаваямі (ЗША) адбылася серыя лазерных стрэлаў. Пра гэта 9 студзеня паведаміла выданне ScienceAlert са спасылкай на інфармацыю Нацыянальнай астранамічнай абсерваторыі Японіі (NAOJ).
Гэтая сцэна была зафіксаваная дзякуючы іх тэлескопу Subaru, які знаходзіцца на вяршыні гавайскай гары Мауна-Кеа.
Яшчэ ў самым пачатку NAOJ лічыла, што лазеры зыходзілі ад радыёлакацыйнага спадарожніка NASA ICESat-2, які выкарыстоўваецца для назірання за таўшчынёй зямнога акіянічнага лёду і лясоў. Аднак ужо 6 лютага NAOJ атрымала больш дэталёвую інфармацыю аб інцыдэнце і прыйшла да высновы, што спадарожнік кітайскі.
«Па словах NASA, гэта не іх прылада. Агенцтва прааналізавала рух лазера і змадэлявала траекторыю спадарожнікаў, якія здольныя іх выпускаць, дзякуючы чаму вызначыла, што крыніцай лазераў з'яўляецца кітайскі спадарожнік Daqi-1/AEMS», — піша газета.
Паведамляецца, што Daqi-1 быў запушчаны ў красавіку мінулага года для маніторынгу ўзроўню вугляроду і забруджвання атмасферы Зямлі. Робіць ён гэта пры дапамозе інструмента ACDL — лазераў, якія могуць выяўляць аэразолі і вуглякіслы газ. Лічыцца, што менавіта гэтыя лазеры назіраліся ў паветранай прасторы над Гаваямі.
Пры гэтым ужо шмат гадоў Кітай таксама займаецца распрацоўкай розных відаў зброі накіраванай энергіі (DEW), як спадарожнікавыя лазерныя сістэмы, электрамагнітныя рэйкатроны і мікрахвалевыя ўстаноўкі.
Як і ў выпадку з нядаўнім ініцыдэнтам з кітайскім аэрастатам-шпіёнам, амерыканскія ўлады таксама заклікалі грамадзян не хвалявацца з-за спадарожніка над Гаваямі.
Каментары