Журналісту Паўлу Падабеду прыпісваюць «уваходжанне ў склад экстрэмісцкага фармавання»
Беларускай асацыяцыі журналістаў стаў вядомы дакладны крымінальны артыкул, на падставе якога ў мінскім СІЗА ўтрымліваюць відэааператара-фрылансера Паўла Падабеда. Яму інкрымінуюць «уваходжанне ў склад экстрэмісцкага фармавання», максімальная санкцыя прадугледжвае да 6 гадоў зняволення.
Пра выстаўленае абвінавачванне стала вядома з копіі пастановы на арышт прыватнага аўтамабіля Паўла Падабеда, экспертыза і ацэнка якога, як аказалася, праводзіліся яшчэ на пачатку сакавіка без паведамлення сваякам. У прыватнасці, накладаецца забарона на продаж транспартнага сродку.
Сярод іншага, у дакуменце пазначана, што журналісту прад’яўлены арт. 361-1, ч. 3 Крымінальнага кодэкса — «уваходжанне асобы ў склад экстрэмісцкага фармавання ў мэтах учынення злачынства экстрэмісцкай накіраванасці (удзел у экстрэмісцкім фармаванні)». Такое «злачынства» караецца абмежаваннем волі да 4 гадоў або накіраваннем у калонію на тэрмін ад 2 да 6 гадоў.
Акрамя таго, з той жа пастановы вынікае, што Павел Падабед «удзельнічаў у несанкцыянаваных акцыях/дзеяннях 14 ліпеня 2020 года і ў наступныя дні». У згаданыя даты праходзілі пратэсныя акцыі супраць рашэння Цэнтрвыбаркама Беларусі адмовіць у рэгістрацыі прэтэндэнтам на ўдзел у прэзідэнцкай кампаніі ўжо арыштаванаму экс-банкіру Віктару Бабарыку і былому кіраўніку Парка высокіх тэхналогій Валерыю Цапкалу. Тады і незалежныя, і дзяржаўныя СМІ актыўна асвятлялі перадвыбарчыя баталіі, таму знаходжанне на вуліцы відэааператара Паўла Падабеда цалкам лагічнае.
Сам Павел Падабед яшчэ раней паведаміў у лістах, што адмовіўся даваць супраць сябе паказанні на этапе следства і цяпер у чаканні перадачы справы пракурору і далейшага накіравання ў суд. Сёння якраз тры месяцы, як ён за кратамі.
Паўла Падабеда затрымалі сёлета 20 студзеня. Сілавікі «заглыбіліся» ў яго сацсеткі ажно да 2012 года і на падставе старых рэпостаў абвінавацілі ў распаўсюджванні «экстрэмісцкіх матэрыялаў» — нягледзячы на тое, што падобных статусаў у незалежных СМІ ў той час не было як з’явы. Суд удавацца ў нюансы не пажадаў і на падставе адміністрацыйнага артыкула 19.11 пакараў журналіста 15 суткамі арышту з адбыццём у ІЧУ Мінскага раёна.
Аднак напярэдадні меркаванага вызвалення яго забралі на допыт, пасля чаго перавялі ў следчы ізалятар на вуліцы Валадарскага. І ўжо там прад’явілі «спрыянне экстрэмізму». 28 лютага праваабарончая супольнасць прызнала Паўла Падабеда палітычным вязнем.
Цяпер чытаюць
Медсястра з Лепеля закахалася ў расійскага вайскоўца і паехала наёмніцай на фронт ва Украіну21
Каментары