Telegram плануе істотна павялічыць колькасць рэкламы, убудуюць і новыя плацежныя інструменты
Са справаздачы для інвестараў таксама стала вядома пра тое, як яшчэ збіраюцца манетызаваць месенджар.
Нядаўна кліентам расійскай інвестыцыйнай кампаніі БКС разаслалі прапанову ад Telegram, у якой агучваюцца планы кампаніі. З іх вынікае даволі шмат цікавага.
Якія віды рэкламы і манетызацыі плануе запусціць Telegram?
Першае — гэта рэклама ў сторыс. Разглядаецца магчымасць стварэння ў сторыс стужак рэкамендацый, сярод якіх будуць і рэкламныя публікацыі, такое ўжо ёсць, да прыкладу, у TikTok і Instagram.
Другое — гэта змяненне формы рэкламы ў каналах. На адзін рэкламны пост будзе паказвацца дзесяць нерэкламных, то-бок агульная колькасць рэкламы ў праграме адчувальна вырасце. Як менавіта гэта будзе выглядаць, пакуль незразумела.
Трэці пункт — гэта ўкараненне Premium-падпісак для камандаў. Плануецца дадаць магчымасць ствараць карпаратыўныя папкі і прасторы, а таксама павялічыць аб'ём загрузкі файлаў.
Чацвёрты пункт — гэта пашырэнне бонусаў, якія будзе даваць Premium-падпіска. Такім чынам плануецца, што да трох адсоткаў карыстальнікаў будуць купляць падпіску, што прынясе кампаніі да двух мільярдаў даляраў штогод.
Пяты пункт — гэта манетызацыя плацежнай сістэмы, убудаванай у праграму. Людзі здолеюць як плаціць праз Telegram непасрэдна адно аднаму, гэтак і здзяйсняць аплату за розныя сэрвісы, а Telegram будзе браць сабе камісію з плацяжоў. Telegram вядзе перамовы з індыйскай фінтэх-кампаніяй — менавіта ў гэтай краіне сервіс запусціцца найперш.
Яшчэ адным пунктам называецца актывізацыя продажу і перапродажу імёнаў карыстальнікаў на платформе Fragment. Яна працуе ўжо больш за год, і самы дарагі юзернэйм, @news, быў прададзены за 2,4 мільёна даляраў. Усе разлікі там адбываюцца праз крыптавалюту TON.
Што яшчэ стала вядома пра Telegram?
Даўгі кампаніі сягаюць двух мільярдаў даляраў. Пры гэтым рынкавы кошт праграмы ацэньваецца ў 35 мільярдаў. Сэрвіс цалкам належыць Паўлу Дураву.
Таксама плануецца, што праз тры гады месенджарам будуць карыстацца 1,2 мільярда чалавек.
«Наша Нiва» — бастыён беларушчыны
ПАДТРЫМАЦЬ
Каментары