Незалежныя купалаўцы здымаюць кіно. Гэта будзе экранізацыя апавядання пра ўнікальнага жыхара беларускага райцэнтра і яго неспакойны лёс у XX стагоддзі, не абыдзецца і без містыкі. «Наша Ніва» спытала падрабязнасці ў рэжысёра праекта Паўла Яскевіча.
Фільм заснаваны на апавяданні «Тры магілы Арыка Фергаса» пісьменніка Змітра Дзядзенкі. Раней купалаўцы ўжо працавалі з гэтым тэкстам — гэта была адна з гісторый, фрагменты з якой акцёры агучвалі ў кастрычніку падчас мастацкіх чытанняў «Дзённікі эміграцыі». Цяпер беларусы вырашылі сваімі сіламі зняць па апавяданні кароткаметражку, і, паводле Паўла, гэта будзе вельмі камерная стужка — яе цалкам знялі ў памяшканні варшаўскага бара Scena Chmielna.
«Усе цяпер нешта робяць у эміграцыі для нашага беларускага мастацтва. Часам чытаю, як дзеячы мастацтва працуюць у таксі, як Ігар Сігоў. Хацелася б, каб і гледачы, і ўсе беларусы разумелі: і тыя беларусы, хто працуе ў таксі ці ў «Жабцы», усё ж такі ствараюць мастацтва. Цяпер у нас няма фінансавання і мы робім фільм сваімі сіламі, бо проста ёсць жаданне нешта зрабіць», — так Павел апісвае ўмовы, у якіх паўстае праект.
У стужцы здымуцца Алег Гарбуз, Яўгенія Кульбачная, Андрэй Дробыш, Сяргей Чуб. Рэжысёр характарызуе праект як тэлеспектакль — сумяшчэнне кіно і тэатра, што дае больш магчымасцяў, чым калі б гісторыю Арыка Фергаса расказвалі сродкамі толькі аднаго з мастацтваў.
Галоўны персанаж, якога грае Алег Гарбуз, прыязджае ў камандзіроўку ў беларускі гарадок, і там праз помнік і асабіста сутыкаецца з чалавекам, які праявіў сябе па-геройску ў розныя часы.
Гэта містычная гісторыя, але яна мае свае паралелі з беларускай рэчаіснасцю. Павел мяркуе, што такі Фергас далёка не адзіны. Цікава, што Арык Фергас праявіў сябе ў тры гістарычныя перыяды, якія дужа вабяць дзяржаўную прапаганду: падчас Другой сусветнай, у паслярэвалюцыйную грамадзянскую вайну і ў 1905-м падчас барацьбы з царскімі жандарамі.
Пакуль невядома, калі фільм можна будзе паглядзець. Хутчэй за ўсё, ён з’явіцца на ютуб-канале купалаўцаў. Цяпер акцёры плануюць зрабіць другі канал — магчыма, фільм апублікуюць там.
Прачытаць апавяданне Змітра Дзядзенкі «Тры магілы Арыка Фергаса» можна тут.
«Наша Нiва» — бастыён беларушчыны
ПАДТРЫМАЦЬЦяпер чытаюць
«Заходзіш у камеру, а яны кажуць: «Мы з табой адмаўляемся сядзець». Ціханоўскі расказаў, як сутыкнуўся з праблемай нізкага статусу8
Каментары