Беларускі галкіпер Аляксей Коласаў можа стаць 16-м беларусам у наймацнейшай хакейнай лізе свету.
Галкіпер зборнай Беларусі Аляксей Коласаў, які па выніках сезона быў прызнаны найлепшым брамнікам у складзе «зуброў», а таксама атрымаў узнагароду найлепшага гульца, вырашыў працягнуць кар'еру ў самай моцнай хакейнай лізе свету, піша Tochka.by.
22-гадовы беларус, які падпісаў у мінулым годзе трохгадовы кантракт з «Філадэльфіяй» у сезоне-2023/24 быў асноўным брамнікам «Дынама». У «рэгулярцы» ён правёў 47 матчаў пры 90,7% адбітых кідках і каэфіцыенце надзейнасці 2,39.
На рахунку Аляксея чатыры «сухія» матчы (восьмы паказчык у КХЛ), акрамя таго ён правёў шэсць гульняў у плэй-оф, адбіўшы 92,5% кідкоў пры каэфіцыенце надзейнасці 2,21.
Мінскае «Дынама падзякавала Коласаву за гульню: «Дзякуй за магутны сезон, Лёха! Жадаем поспеху ў «Філадэльфіі»».
Але калі «зубры» сезон ужо завяршылі, то Аляксей працягне яго ў сістэме «Філадэльфіі Флайерз».
Менавіта так, у сістэме, бо ў рэкардсмена «Дынама» па перамогах у КХЛ (132 матчы і 52 вікторыі ў рэгулярным сезоне) з «лётчыкамі» трохгадовы кантракт пачаткоўца, які месцы ў асноўным складзе не гарантуе.
«Філадэльфія» абрала мінчука ў трэцім раўндзе драфту-2021 пад агульным 78-м нумарам, а летась уклала пагадненне з заробкам $925 тысяч за сезон.
Галкіпер можа стаць 16-м беларусам у НХЛ (восенню мінулага года ў лізе дэбютаваў Ілля Салаўёў) і пятым — у сезоне.
Чакаем дэбюту Аляксея і рэкорду
Калі Коласаў дэбютуе, то стане сааўтарам беларускага рэкорду — ніколі яшчэ адразу пяць нашых хакеістаў не гулялі ў Нацыянальнай хакейнай лізе адначасова. Ну і ніколі не было беларуса-галкіпера ў НХЛ.
У гэтым сезоне ў НХЛ гуляюць Ягор Шаранговіч («Калгары») і Аляксей Протас («Вашынгтон»), правёў шэсць гульняў Ілля Салаўёў («Калгары») і быў адпраўлены ў фарм-клуб, згуляў адзін матч Уладзіслаў Калячонак («Арызона»).
Цяпер «Флайерз» змагаюцца за трапленне ў плэй-оф. Каманда на трэцім месцы ў сваім дывізіёне і сёмым ва Усходняй канферэнцыі. Да канца рэгулярнага чэмпіянату «Філадэльфіі» засталося правесці дзевяць паядынкаў.
У гэтым сезоне ў складзе «Філадэльфіі» адзначыліся ўжо чатыры галкіперы, але яны надта не ўражваюць.
Застаецца спадзявацца, што беларус дапаможа «Флаерз» прабіцца ў плэй-оф ці хаця б зможа пацясніць вопытных канкурэнтаў, а не стане атрымліваць практыку ў фарм-клубе.
Цяпер чытаюць
Расійскі рэпер Ягор Крыд зняўся ў майцы з выявай героя фільма «Ідзі і глядзі», якому дамалявалі пірсінг і татуіроўкі. Цішотку выпусцілі крама беларускі1010
Каментары