Міністр унутраных спраў Літвы Уладзіслаў Кандратовіч паведаміў, што рыхтуецца шырокі пакет змяненняў у міграцыйнай палітыцы краіны. Сярод прапанаваных мер разглядаецца магчымасць закрыцця мяжы з Беларуссю. Гэта звязана з неабходнасцю падрыхтоўкі да новых тактык нелегальных мігрантаў, якія фіксуюцца ў суседніх краінах.
Міністр унутраных спраў Літвы Уладзіслаў Кандратовіч у інтэрв'ю LRT заявіў, што адна з галоўных пагроз, якія Літва мае на мяжы, — гэта інструменталізаваная міграцыя або «ўзброеная» міграцыя.
Кандратовіч адзначыў, што ў Польшчы зафіксаваныя выпадкі, калі нелегальныя мігранты ўжываюць гвалт супраць памежнікаў, кідаючы ў іх камяні і выкарыстоўваючы іншыя сродкі. Хоць у Літве такіх інцыдэнтаў пакуль не было, міністр падкрэсліў важнасць падрыхтоўкі да магчымых пагроз і адаптацыі прававой базы для эфектыўнага рэагавання на новыя выклікі.
«Мы бачым некаторыя змены ў тактыцы ў Польшчы, цяпер яны пачалі нападаць на памежнікаў, кідаць камяні і выкарыстоўваць іншыя сродкі. Мы бачым, што тыя захады, якія былі слушныя пару гадоў таму ці ў мінулым годзе, могуць не быць слушнымі сёння, таму мы павінны ўмець адпаведна рэагаваць, пераймаць лепшыя практыкі і аналізаваць сітуацыю ў іншых краінах. Аўтаматычна трэба падрыхтаваць і нашу прававую базу. Вельмі важна, каб заканадаўчая база была адпаведнай, каб мы былі гатовыя да будучых пагроз», — сказаў ён.
Акрамя таго, Літва аналізуе практыку Фінляндыі і Польшчы адносна закрыцця межаў і абмежавання прыёму заявак на прытулак. Гэта можа стаць часткай стратэгіі па супрацьдзеянні выкарыстанню міграцыі як элемента гібрыднай вайны. Міністр падкрэсліў, што ўсе магчымыя меры будуць накіраваны на забеспячэнне бяспекі краіны і яе грамадзян.
Як заўважыла выданне Reform.news, мігранты зноў актывізаваліся па ўсёй граніцы Беларусі і ЕС. Польскія памежнікі за панядзелак зарэгістравалі 90 спробаў парушэння мяжы. У польскія патрулі на мяжы зноў ляцелі камяні.
На мяжы Літвы і Латвіі колькасць атак мігрантаў павялічылася ў параўнанні з выходнымі. Літоўскія пагранічнікі паведамілі аб 16 спробах. Звычайна на літоўскай мяжы фіксуюцца адзінкавыя парушэнні.
Латвійская служба справаздачылася аб 52 спробах парушэння мяжы.
Цяпер чытаюць
У загінулай у Сляпянцы дзяўчыне апазналі Яну Кастранкову2
Каментары
[Зрэдагавана]