У Германіі пачаўся суд над украінцам, якога абвінавачваюць у падрыве «Паўночнага патоку»

У Гамбургу ў сераду пачаўся суд над былым украінскім афіцэрам Сяргеем Кузняцовым, якога абвінавачваюць у падрыве газаправода «Паўночны паток» у Балтыйскім моры ў верасні 2022 года — праз сем месяцаў пасля пачатку развязанай Расіяй вайны, піша Бі-бі-сі.

У канцы чэрвеня Кузняцову было прад’яўлена афіцыйнае абвінавачанне ў «нападзе на аб’ект грамадзянскай энергетычнай інфраструктуры, учыненні выбуху з выкарыстаннем выбуховых рэчываў і разбурэнні збудаванняў». Следства лічыць, што менавіта ён кіраваў аперацыяй на яхце, з якой, паводле версіі пракуратуры, была праведзена дыверсія.

Кузняцоў быў затрыманы летам 2025 года ў Італіі паводле еўрапейскага ордара, выдадзенага Германіяй, і ў лістападзе таго ж года экстрадаваны ў Германію. Кузняцоў стаў першым з падазраваных у падрыве «Паўночнага патоку», які паўстаў перад судом.

Ён адмаўляе ўсе абвінавачанні, але, як пісала летам нямецкая прэса, следчыя сцвярджаюць, што ён сам сябе выкрыў падчас тэлефонных размоў са сваякамі і знаёмымі, якія вёў, знаходзячыся пад вартай у Італіі. Тым не менш адвакат Сяргея заявіў, што ўпэўнены: суд цалкам яго апраўдае.

Яшчэ адзін падазраваны, Уладзімір Жураўлёў, у жніўні быў затрыманы ў Харватыі і цяпер аспрэчвае вераснёўскае рашэнне харвацкага суда аб яго выдачы Германіі.

Да гэтага Жураўлёў ужо пазбег экстрадыцыі з Польшчы: там яго арыштавалі паводле нямецкага ордара ў мінулым годзе, але ў кастрычніку таго ж года суд у Варшаве вырашыў адмовіць Германіі ў экстрадыцыі.

Суддзя заявіў, што, калі гэтую дыверсію сапраўды ўчынілі ўкраінцы, яе варта расцэньваць як «апраўданы, рацыянальны і справядлівы» акт самаабароны.

Тры з чатырох нітак газаправодаў «Паўночны паток — 1» і «Паўночны паток — 2» былі ўзарваныя на дне Балтыйскага мора, на глыбіні каля 80 метраў, недалёка ад дацкага вострава Борнхальм 26 верасня 2022 года.

Гэтыя дзве чаргі газаправода былі пабудаваныя для паставак газу з Расіі ў Германію, але на момант дыверсіі газ па гэтых трубаправодах не перапампоўваўся. «Паўночны паток — 1» Расія да таго часу сама перакрыла, спрабуючы шантажаваць Германію і іншыя краіны Заходняй Еўропы, якія падтрымалі Украіну, а другую чаргу не паспелі запусціць да пачатку вайны.

Адразу пасля дыверсіі многія падазравалі Расію, а расійскі прэзідэнт Уладзімір Пуцін абвінаваціў «англасаксаў».

«Англасаксам ужо мала санкцый, яны перайшлі да дыверсій — неверагодна, але факт, — арганізаваўшы выбухі на міжнародных газавых магістралях «Паўночнага патоку», якія праходзяць па дне Балтыйскага мора. Фактычна прыступілі да знішчэння агульнаеўрапейскай энергетычнай інфраструктуры», — заявіў Пуцін праз чатыры дні пасля дыверсіі.

• 1
• 0
• 0
• 2
• 1
• 0
• 0
• 0