«Чым пакістанцы ў Беларусі адрозніваюцца ад беларусаў у Польшчы?»
Стваральнік «Чыстага кіта» Іван Шыла салідарызаваўся з пакістанскімі мігрантамі.
«Ведаю двух беларусаў, мужчын, па 35 гадоў, якія жывуць у здымных кватэрах з некалькімі такімі ж беларусамі, працуюць на будоўлі ці Еўрарадыё, ведаюць некалькі слоў на польскай — але яны асаблівыя мігранты, амаль палякі, а будаўнік з Пакістана ў Беларусі — гэта фу, гэта кепскія гены»,
— з жорсткім сарказмам прыпячатаў у твітары прадпрымальнік Іван Шыла.
Гэтаму папярэднічала яго прынцыповая дыскусія з кінакрытыкам і журналістам Тарасам Тарналіцкім — на тэму, якая выклікала на мінулым тыдні бурлівую палеміку. У спрэчку бізнэсоўца з радыйнікам прыйшлі са сваімі меркаваннямі і людзі знутры Беларусі.
Спачатку вы не цікавіцеся палітыкай.
Потым цалкам ігнаруеце выбары.
І нарэшце да вас у краіну прысылаюць 150 тысяч пакістанцаў.
А што здарылася-та, га?
«Спачатку вы не цікавіцеся палітыкай. Потым цалкам ігнаруеце выбары. І нарэшце да вас у краіну прысылаюць 150 тысяч пакістанцаў. А што здарылася, га?» — іранізаваў у сваім пасце Тарналіцкі.
«Чым пакістанцы прынцыпова розняцца ад беларусаў у Польшчы?» — адказаў Шыла.
«Напэўна, тым, што беларусы ў Польшчы — гэта палітычная эміграцыя, а пакістанцы ў Беларусі — гэта эканамічная, заахвочаная і праспансараваная з абодвух бакоў працоўная эміграцыя (ці перасяленне)», — парыраваў Тарналіцкі.
«Беларусы ў Польшчы і пакістанцы ў Беларусі — па сутнасці дзве катэгорыі легальных мігрантаў. Чым дрэнная легальная міграцыя?» — працягваў Шыла.
«Тым, што вы чамусьці ігнаруеце палітычныя, эканамічныя і сацыяльныя ўмовы, у якіх гэтая «легальная» (тэрмін даволі спрэчны ў абодвух выпадках) эміграцыя адбываецца», — кажа Тарналіцкі.
«Легальныя мігранты ў Беларусь — гэта кепска? Наша трагедыя як нацыі ў тым, што нас мала і мы бедныя: кінакрытык у нас — Тарналіцкі, музычны крытык — Чарнуха, а Шыла запісвае (запісваў, дзякуй богу) палітычныя падкасты. Любыя новыя людзі (легальныя мігранты) — гэта добра», — такая пазіцыя Шылы.
«Мы не ведаем, на якіх умовах усе гэтыя людзі будуць працаваць і жыць. Ці будуць іх замацоўваць на месцах па размеркаванні? Ці пабудуюць для іх дадатковае жытло ці адчыняць праграму іпатэкі? Як будзе выглядаць інтэграцыя пераважна англамоўных пакістанцаў у рускамоўнае грамадства», — настойваў Тарналіцкі.
«Паўтару пытанне: у чым прынцыповае адрозненне і што дае вам права ставіць сябе вышэй за іх? Колер скуры? Ваша ламаная польская? Ваша магчымасць здымаць кватэру на трох у Варшаве? — атакаваў Шыла. — Легальныя мігранты шукаюць лепшага жыцця. Легальныя мігранты — гэта добра для любой эканомікі (альбо, як мінімум, не шкодзіць ёй). Больш англамоўных у Беларусі — гэта цуд. Больш кантактаў з іншай культурай — гэта штуршок для нацыянальнай, праверка нашых падмуркаў. Але галоўнае — гэта больш беларусаў і дабрабыту».
«У вас пазіцыя як у БССРаўскіх партапаратчыкаў пры канцы існавання СССР — культурны складнік не цікавы, галоўнае прагматызм і эканамічная выгада па кіраванні тэрыторыяй. З такім падыходам дзіўна, што вы яшчэ не топіце за абноўлены ўрад пад кіраўніцтвам Турчына», — абвінаваціў прадпрымальніка кінакрытык.
«Што дае табе права лічыць сябе лепшым за пакістанца?» — падтрымаў Шылу каментатар Фердынанд.
«А таму што ў мяне была магчымасць легалізацыі ў гэтай краіне па праве гістарычнага мінулага маёй сям'і, якая жыла ў Заходняй Беларусі ў міжваенны час. Таму можа засунуць свае параўнанні ў вядомае месца», — пратэставаў Тарналіцкі.
«А змяняльная ўлада праблему дэпапуляцыі рашала б неяк інакш?» — заўважыў каментатар Вова Лу.
«Тарас, ты як з'ехаў, хутка, я бачу, страціў сувязь з рэальнасцю. Белае паліто табе часам не душыць?» і «Алё, гаража, у Беларусі няма выбараў — ёсць фальсіфікацыі» — гэта ў дыскусію прыйшлі каментатары, якія глядзяць на сітуацыю вачыма людзей знутры краіны.
Тэма прывозу пакістанцаў у Беларусь узнікла пасля заяваў Аляксандра Лукашэнкі і прэм'ера Пакістана Шарыфа па выніках візіту апошняга ў Беларусь.
Яна выклікала сярод беларусаў бурныя абмеркаванні. Людзі баяцца, што мігранты адбяруць у іх працоўныя месцы і прывядуць да зніжэння і без таго найніжэйшых у Еўропе заробкаў. Каменты можна пачытаць у тыктоку тут (пост сабраў 43 тысячы лайкаў):
І тут (30 тысяч лайкаў):
Лукашэнкаўцы заўважылі абурэнне і змушаныя былі падключыць прапагандыстаў. Рыгор Азаронак заявіў пра страхі згвалтавання: «яны чамусьці думаюць, што іх зараз згвалцяць». А Ігар Тур патлумачыў неабходнасць прывозу работнікаў з Пакістана патрэбай стварыць канкурэнцыю на рынку працы: Што значыць прыезд 150 тысяч мігрантаў з Пакістана ў Беларусь: погляд Ігара Тура.
У той жа час нехта стварыў правакатыўную суполку Dolgb, каб выяўляць сярод моладзі радыкальных праціўнікаў прывозу мігрантаў.
А вы як ацэньваеце погляды на праблему, выказаныя Іванам Шылам і Тарасам Тарналіцкім?
Зянковіч назваў імя правакатара, з якога пачалася справа змоўшчыкаў супраць Лукашэнкі. Яго кар'ера цяпер пайшла ўгару19
Каментары