Кіраўнік Ляхавічаў аб працоўных мігрантах у раёне: Пакістанцаў пакуль не разглядаем, хаця прапановы ўжо закідвалі
«У нас працуюць туркмены. Не перашкаджаюць яны жыць і працаваць беларусам».
Блогер Андрэй Павук спытаў у старшыні Ляхавіцкага райвыканкама Мікалая Мароза пра працоўных мігрантаў, а той шчыра расказаў. Размову блогер апублікаваў на сваім ютуб-канале.
Па словах чыноўніка, у раёне працуюць туркмены. Каля дзесяці чалавек — на прадпрыемстве «Белдан» (займаецца вытворчасці дацкай астуджанай беконнай свініны) і каля 20 чалавек на аграпрадпрыемстве «Яблыневы пасад».
«Ну, не перашкаджаюць яны жыць і працаваць беларусам, у тым ліку», — даводзіць Мароз. Ён адзначыў, што яны пакуль прыезд пакістанцаў у раён не разглядаюць. «Хаця прапановы ўжо закідвалі — колькі чалавек трэба на якія сферы».
Па словах Мароза, працоўныя мігранты ў гаспадарках Ляхавіцкага раёна выконваюць работы, якія не патрабуюць кваліфікацыі. Так у «Яблыневым пасадзе» яны занятыя ўстаноўкай шпалер:
«Слуп закапаў, слуп выкапаў, разнёс, паклаў, ямку выкапаў. На такіх работах, здаецца, туркмены і нядрэнна працуюць».
За такую работу, як сцвярджае чыноўнік, рабочыя атрымліваюць 600 даляраў на рукі. Пры гэтым працуюць з 8 ранку да 8 вечара.
На пытанне Павука, ці не больш працаздольныя туркмены за беларусаў, Мароз адказаў, што «беларусы нармальна працуюць таксама».
Чаму ж тады ўзнікае неабходнасць у працоўных мігрантах? На гэта старшыня Ляхавіцкага райвыканкама адказаў, што працоўная міграцыя цяпер назіраецца ва ўсім свеце. «Пастаянна патрэбна нейкая працоўная, танная сіла». Але ў яго раёне «пакуль такога не назіраецца». А да тых працоўных мігрантаў, што працуюць, пытанняў ніякіх няма:
«І задавальняе беларусаў. І разам працуюць, як кажуць. Ніякіх пытанняў няма».
Цяпер чытаюць
У дажджавіках і па калена ў гразі. Чыноўнікаў у дождж пагналі на суботнік, сам Лукашэнка не пайшоў26
У дажджавіках і па калена ў гразі. Чыноўнікаў у дождж пагналі на суботнік, сам Лукашэнка не пайшоў
Ездзілі шукаць нават у БССР, а неапазнанае цела 30 гадоў ляжала ў спецсховішчы. Новыя дэталі загадкавага знікнення ў ЗША беларускага пісьменніка Міколы Цэлеша22
Каментары