Пуцін заявіў пра амаль двухразовы рост колькасці ахвотных адправіцца на вайну ва Украіну
Уладзімір Пуцін на сустрэчы з членамі арганізацыі «Дзелавая Расія» заявіў, што штомесяц ваяваць ва Украіну адпраўляюцца 50-60 тысяч расіян. Раней штомесячны набор расійскага войска складаў больш за 30 тысяч чалавек, вынікала з заявы Пуціна ў снежні, адзначае «Агентство».
«Я хачу звярнуць увагу вось на што: калі кіеўскія ўлады займаюцца прымусовай мабілізацыяй, людзей як сабак вылоўліваюць на вуліцы, то ў нас-то хлопцы ідуць добраахвотна, самі ідуць. Там ну 30 тысяч яны цяпер вылоўліваюць. А ў нас па 50-60 тысяч у месяц самі прыходзяць. З вашых працоўных калектываў у тым ліку», — сказаў Пуцін.
Названыя ім лічбы істотна перавышаюць ацэнкі набору навабранцаў, якія расійскія ўлады давалі раней. У снежні 2024 года Пуцін казаў, што штодня кантракты прыходзяць заключаць больш за тысячу чалавек. Такім чынам, паводле яго слоў, кантракты заключалі больш за 30 тысяч чалавек у месяц.
Намеснік старшыні Рады бяспекі Расіі Дзмітрый Мядзведзеў у студзені гэтага года сцвярджаў, што за 2024 год кантракты з Міністэрствам абароны заключылі 450 тысяч чалавек, яшчэ 40 тысяч паехалі на фронт добраахвотнікамі. З гэтых даных вынікае, што кожны месяц заключалі кантракты каля 41 тысячы навабранцаў. Пры гэтым, як і Пуцін, Мядзведзеў дадаў, што штодня кантракты заключалі больш за тысячу чалавек.
Пры гэтым, паводле звестак Мінабароны Вялікабрытаніі, у красавіку 2025 года расійская армія страціла ва Украіне звыш 36 тысяч вайскоўцаў параненымі і забітымі (у сярэднім 1209 чалавек у дзень). У пачатку года, па ацэнцы брытанскага вайсковага ведамства, гэты паказчык быў яшчэ вышэйшы — у студзені Расія страціла больш за 48 тысяч параненымі і забітымі (1556 чалавек у дзень).
Расійскае Мінабароны звесткі пра свае страты ва Украіне не раскрывае.
«ЗША хочуць нармалізацыі літоўска-беларускіх адносін. Адсюль і рухі з офісам Ціханоўскай»4
Каментары
І дзе яны?