«Проста ў нас шапіто скончылася». У Белдзяржцырку патлумачылі, чаму вымушаныя шукаць адразу 15 супрацоўнікаў
Беларускі дзяржаўны цырк абвясціў пра пошук адразу 15 супрацоўнікаў. З іх вялікая частка вакансій — творчыя. Чаму ў цырку шукаюць так шмат людзей? Пад выглядам шукальніцы вакансіі журналістка выдання «Люстэрка» патэлефанавала ва ўстанову, каб даведацца, з чым звязанае звальненне такой вялікай колькасці работнікаў.
«Вы можаце не хвалявацца, гэта проста ў нас шапіто скончылася, таму вакансіі адкрыліся, зараз яны зноў закрываюцца. Нам трэба было выставіць», — расказаў дырэктар цырка Уладзімір Шабан і папрасіў звязацца з ягонай памочніцай.
Тая адзначыла, што вакансіі з’явіліся не адначасова, а паступова.
«Магчыма, вам раней не траплялася наша аб’ява, таму што рэдка хто заходзіць на сайт цырка [у гэты раздзел], — патлумачыла памочніца дырэктара. — А вакансій у нас шмат, таму што, у прынцыпе, у нас шмат штатных адзінак, а паколькі ў Беларусі няма менавіта цыркавога вучылішча і мы краіна маленькая, знайсці прафесійных людзей даволі складана. Не, гэта не значыць, што ад нас адначасова ўсе пайшлі. У нас штат вялікі, проста сапраўды вялікі, у нас не дзесяць чалавек у штаце працуе, таму дзесяць вакансій на фоне 300 чалавек, паверце, гэта не так ужо і шмат».
Пры гэтым супрацоўніца запэўніла, што заробкі ў цырку плацяць своечасова і не затрымліваюць.
«Я тут працую 20 гадоў, але на маёй памяці такога не было, — сцвярджае яна. Аднак вілку заробкаў агучыць не змагла, заявіўшы, што ўсё вырашаецца, «калі вы прыйдзеце».
«У нас ва ўсіх розныя заробкі, і прынята неяк не абмяркоўваць гэта паміж сабой, таму. Я нават не ведаю на ўзроўні чутак, што там адбываецца, — сказала памочніца дырэктара. — Ну і зноў жа ўсё залежыць ад кваліфікацыі, ад вашых уменняў. Калі вы там, я не ведаю, вобразна кажучы, скачаце тры сальта-мартале, гэта будзе адзін заробак, калі два — то іншы».
Што тычыцца вакансій, якія вісяць на сайце з 3 лістапада 2023 года, то супрацоўніца цырка дапусціла: не выключана, што гэта старонка не абнаўлялася.
«Але калі яны там вісяць, то цалкам магчыма, што ў нас яшчэ патрабуюцца [супрацоўнікі]. Для прыкладу: нам патрабуецца пяць клоўнаў. Ну знайсці за раз пяць клоўнаў даволі складана», — патлумачыла яна.
Між тым на сайце Дзяржаўнай службы занятасці значыцца 15 вакансій ад Белдзяржцырка. Так, артыстам балета гатовыя плаціць 1500—2000 рублёў, уніфармісту (спецыяліст, які засцілае манеж, усталёўвае абсталяванне і г. д.) — 1600—2000 рублёў, дрэсіроўшчыку — 375—625 рублёў за чвэрць стаўкі. Прыбіральшчыкам і рабочым — 1200—1500 рублёў, эканамісту — 1500—2000 рублёў.
«А дзе ўсе?» Белдзяржцырк шукае адразу 15 работнікаў. У каментарах — шапіто
Мінская кампанія прапануе працу 10‑ці кіроўцам таксі. Абавязковая ўмова — веданне туркменскай мовы
У Гродзенскі драмтэатр прыйшла маладая актрыса з Расіі. У тэатра кадравыя праблемы
«Он пашет, я красивая». Калгас на Мазыршчыне заваблівае работнікаў песнямі і танцамі ВІДЭА
«Бульба» з Оршы пайшоў ваяваць за Расію — цяпер сястра шукае яго ці хаця б яго парэшткі9
Каментары