«Каб рабіць рэчы, у якіх я слабы». Стваральнік Linux патлумачыў, чаму любіць ШІ і які менавіта

«Напраўду, мне вельмі падабаецца выкарыстоўваць ШІ», — адзначыў ён у размове са сваім сябрам і кіраўніком Ericsson Дзіркам Хондэлам.

Але адразу агаварыўся, што трэба «вельмі асцярожна выкарыстоўваць ШІ, калі робіш нешта рэальнае і важнае». Хоць прызнаў, што так было не заўсёды і раней ён ставіўся да ШІ-праграмавання скептычна.

Ён дадаў, што не вельмі шмат піша кодаў для ядра.

«Калі шчыра, я не асабліва займаюся напісаннем кодаў для ядра. Я мейнтэйнер. Ядро Linux — гэта праект, дзе рэальную працу робяць іншыя людзі, а я выступаю пунктам збору. Але я ўсё яшчэ атрымліваю велізарнае задавальненне ад праграмавання.

Я мяркую, што ШІ — гэта выдатны інструмент, калі выкарыстоўваць яго правільна і ставіцца да яго менавіта як да інструмента, і для мяне кодзіць з ім нашмат прыемней», — сказаў Торвальдс.

Ён дадаў, што пачаў праграмаваць прыблізна ў 1981 годзе, калі камп’ютары і праграмы, з якімі можна было параўнаць свае праграмы, былі нашмат прасцейшыя. Сёння, паводле яго слоў, усё інакш.

«Планка ў распрацоўцы ПЗ паднялася настолькі высока, што цяжка бачыць у сваіх уласных невялікіх намаганнях хоць нешта вартае, таму што ты звык да ўсіх гэтых адпаліраваных, прафесійных праграм. …

Многія насміхаюцца з вайб-кодзінгу, але я лічу, што гэта выдатны спосаб знайсці радасць у праграмаванні. Гэта дае табе пачуццё, што ты робіш нешта значнае. Гэта дазваляе навічкам у праграмаванні рабіць рэчы, якім інакш было б вельмі цяжка даць рады», — працягнуў Торвальдс.

Ён дадаў, што яму падабаецца погляд на ШІ як на «ўваходны наркотык». Ён расказаў пра свой пэт-праект — гітарную педаль.

«І я разумеў, што раблю. У мяне быў карыстальніцкі інтэрфейс, які я сам напісаў на C, ён працаваў на мікракантролеры і выводзіўся на гэты маленькі экран, і я падумаў: «Гэта проста глупства. Вонкава выглядае як нешта з 80-х». Я хацеў, каб гэта выглядала сучасна. Але я не пішу на Java. Я займаюся ядрамі», — падзяліўся Торвальдс.

«Таму я выкарыстоўваю ШІ, каб рабіць рэчы, у якіх я слабы», — дадаў ён.

Торвальдс ужо прымяняе ШІ ў працы над ядром Linux: нядаўнюю эксперыментальную галіну для аптымізацыі памяці ён пісаў з дапамогай Claude Code. У суправаджальным лісце да патча ён паведаміў, што код, тэсты і першы чарнавік дакументацыі былі зробленыя ШІ-памочнікам пад яго кантролем.

Пры гэтым Торвальдс прызнае, што ў ШІ-інструментаў ёсць і адваротны бок. Напрыклад, мейнтэйнераў завальваюць сумнеўнымі баг-рэпартамі і павярхоўнымі праўкамі.

• 6
• 0
• 0
• 0
• 0
• 0
• 0
• 0