Расійскія і лукашэнкаўскія каналы распаўсюдзілі два фэйкі пра сустрэчу ў Белым доме. Паказальна, якія
Для стварэння фэйка быў выкарыстаны прымітыўны штучны інтэлект, але каналы беларускіх сілавікоў і на яго купіліся.
Фэйкавае фота еўрапейскіх лідараў, якія нібыта чакалі ў калідоры Белага дома, апублікавала мноства расійскіх і лукашэнкаўскіх каналаў. Вось яно, да прыкладу, у адным з каналаў, якія звязваюць з Мінабароны Беларусі:
А гэта тое самае фота ў канале «Белорусскій сіловік», які, імаверна, звязаны з ГУБАЗіКам.
Між тым яно вырабленае з дапамогай штучнага інтэлекту, што кідаецца ў вочы.
І яшчэ адзін фэйк датычыў працягу падтрымкі Украіны.
«Сёння альбо будзе пагадненне, альбо не. Калі не, то падтрымка Украіны спыняецца», — Трамп». Такі загаловак прайшоў па ўсіх Z-каналах, у тым ліку і па беларускіх каналах, якія працуюць на Маскву. Вось скрыншот з таго самага «Белорусского сіловіка»:
Насамрэч, Трамп такога не казаў.
Там было пытанне такое: «Калі сёння здзелкі не будзе, падтрымка Украіне спыніцца?», на што Трамп адказаў у сваім тыповым стылі: «Я не магу вам гэтага сказаць».
Падтрымка Украіны насамрэч працягваецца, а Расія практычна не мае поспеху на полі боя.
Астатнія акцэнты расійскіх каналаў былі традыцыйнымі. Так, яны імкнуліся стварыць уражанне, што Украіна знаходзіцца ў слабай пазіцыі, што Зяленскі ў адчаі, а Трамп перайшоў на бок Расіі.
Такім чынам, расійскія і лукашэнкаўскія СМІ маюць устаноўку дыскрэдытаваць Еўропу, падаваць яе слабай і несамастойнай і ствараць у вачах расіян ілюзію, што падтрымка Украіны вось-вось скончыцца.
Цяпер чытаюць
«Ні пра што не шкадуй, Света. Жыве Беларусь». Святлана Курс напісала ліст самой сабе, 15‑гадовай6
«Ні пра што не шкадуй, Света. Жыве Беларусь». Святлана Курс напісала ліст самой сабе, 15‑гадовай
Памерла Святлана Курс. У яе творах спалучаліся магія жывога жыцця і бязлітасны псіхалагізм. А ў публічных выступах і ФБ — рэзкі антыімперыялізм і элегантны лірызм1818
Каментары