Улады Венесуэлы паабяцалі вызваліць усіх палітзняволеных на наступным тыдні
Улады Венесуэлы паабяцалі на працягу наступнага тыдня вызваліць усіх зняволеных па палітычных матывах. Пра гэта заявіў старшыня Нацыянальнай асамблеі краіны Хорхе Радрыгес пасля сустрэчы са сваякамі вязняў, паведамляе Euronews.
Спікер мясцовага парламента запэўніў, што вызваленне адбудзецца адразу пасля канчатковага зацвярджэння закона аб амністыі, які прасоўваецца выканаўчай уладай і падтрымліваецца як апазіцыяй, так і Злучанымі Штатамі Амерыкі.
Паводле слоў Радрыгеса, працэс пачнецца паміж аўторкам і пятніцай наступнага тыдня. Ён адзначыў, што пасля ўступлення закона ў сілу ўсе палітзняволеныя будуць на волі, аднак канкрэтных дэталяў механізма вызвалення не агучыў. Заява была зроблена каля будынкаў Нацыянальнай паліцыі ў Каракасе, вядомых як Zona 7.
Сустрэча адбылася на наступны дзень пасля таго, як парламент ухваліў законапраект аб амністыі ў першым чытанні. Дакумент быў унесены часовай прэзідэнткай Венесуэлы Дэлсі Радрыгес і прадугледжвае масавае вызваленне апазіцыйных лідараў, прафсаюзных дзеячаў, журналістаў, студэнтаў і грамадскіх актывістаў, асуджаных або затрыманых з палітычных прычын.
Каб закон уступіў у сілу, ён павінен быць разгледжаны і прыняты ў другім чытанні на адной з чарговых сесій парламента, запланаваных на наступны тыдзень. Пасля гэтага дакумент перададуць на подпіс кіраўніку дзяржавы і апублікуюць афіцыйна.
Законапраект з’явіўся праз некалькі тыдняў пасля ваеннай аперацыі ЗША, у выніку якой былы прэзідэнт Нікалас Мадура быў затрыманы і дастаўлены ў Нью-Ёрк для судовага разгляду па абвінавачанні ў наркатэрарызме.
Дэлсі Радрыгес заявіла, што мэта амністыі — «залячыць раны», нанесеныя шматгадовым палітычным супрацьстаяннем, якое пачалося з прыходам да ўлады чавізму ў 1999 годзе пры Уга Чавесе і працягвалася падчас кіравання Мадура. Закон распаўсюджваецца на падзеі перыяду з 1999 па 2026 год, але не тычыцца цяжкіх злачынстваў, такіх як забойствы, незаконны абарот наркотыкаў і сур’ёзныя парушэнні правоў чалавека.
Амністыя доўгі час заставалася адным з галоўных патрабаванняў венесуэльскай апазіцыі і праваабарончых арганізацый. Пасля адхілення Мадура ад улады гэтая ідэя таксама атрымала выразную падтрымку з боку Злучаных Штатаў.
У Венесуэле будзе не проста вызваленне палітвязняў, а амністыя, прычым за ўсе гады. А мясцовую «амерыканку» ператвораць у грамадскую прастору
Што цяпер з эканомікай Венесуэлы? І ці стала больш свабоды?
Дэлсі Радрыгес заклікала палітыкаў Венесуэлы да дыялогу для пераадолення крызісу
У Венесуэле вызвалены яшчэ каля 80 палітычных зняволеных. Гэтага патрабавалі ЗША
Трамп прызнаўся, што Мадура захапілі пры дапамозе сакрэтнага дыскамбабулятара
«У пашпарце бабулі стаіць дата нараджэння 00.00.1945» — «А ў маёй XX.XX.1940». Як такое можа быць?2
Каментары