У Магілёве будуць судзіць маладую маці — яна зрабіла з немаўляці інваліда

Пракуратура горада Магілёва накіравала ў суд крымінальную справу ў дачыненні да мясцовай жыхаркі, якая сістэматычна здзекавалася з уласнага сына ад яго нараджэння і пакідала яго ў небяспецы. У выніку гвалту ад роднай маці здаровы хлопчык атрымаў інваліднасць і апынуўся ў спецыялізаваным доме дзіцяці.

Гісторыя стала публічнай пасля таго, як суседзі пачалі заўважаць нечалавечыя крыкі з кватэры маладой маці, распавядае СТБ.

Крык дзіцяці быў пранізліва гучным. Маці таксама крычала, што малое не дае ёй спаць і яна не ведае, што з ім рабіць. Яна гарлала на яго: «Чаго ты крычыш? Чаго ты равеш? Супакойся! Заткніся!»

Суседка патэлефанавала ў міліцыю.

На допыце маладая маці прызналася: яна то кідала немаўля, то біла яго галавой аб вугал, часам пакідала аднаго на ложку без нагляду — менавіта таму хлопчык часта падаў.

Спачатку яна нават сама звярталася па медыцынскую дапамогу, але пра апошнія сур'ёзныя траўмы ўчастковаму педыятру нічога не сказала.

Толькі падчас планавага агляду доктарка зразумела — з малым нешта не так. Пры паступленні ў бальніцу медыкі звярнулі ўвагу на кровападцёкі рознай ступені даўнасці ў вобласці грудной клеткі.

Рэнтген паказаў множныя пераломы рэбраў, таксама атрыманыя ў розны час.

За некалькі месяцаў да таго, як хлопчык трапіў у бальніцу, у сям'і ўжо праводзілі сацыяльнае расследаванне. Менавіта тады ў міліцыю паступіў званок ад суседкі, але да яго паставіліся несур'ёзна: праверку правялі павярхоўна і не паведамілі ў аддзел адукацыі.

З-за гэтай халатнасці малое яшчэ доўгі час заставалася ў небяспецы.

У маці дзіця забралі толькі праз тры месяцы. У студзені бягучага года жанчыну пазбавілі бацькоўскіх правоў.

«Маці апускала нованароджанае ў дзіцячую ванначку для купання пры тэмпературы вады звыш 38,0 °С, пры купанні не забяспечвала ўстаноўку ванначкі так, каб яна не перакульвалася, пры пераносе сына на руках належным чынам яго не фіксавала, перамяшчала дзіцячую каляску з дзіцём у ёй, спускаючы яе па лесвічным маршы. Жанчына пакідала немаўля адно без нагляду на працяглы час на ложку, які не быў абсталяваны ахоўнымі ад падзення борцікамі ці іншымі абмежаваннямі. У шэрагу выпадкаў маці ў такія моманты знаходзілася ў стане алкагольнага ап’янення», — піша пракуратура.

Атрыманыя траўмы прывялі да «стойкага парушэння функцый арганізма».

Хлопчыку паставілі часовую катэгорыю «дзіця-інвалід». Цяпер ён знаходзіцца ў спецыялізаваным доме дзіцяці.

Паводле слоў выхавальнікаў, апетыт у яго добры, як у здаровага і моцнага малога. Такім ён і нарадзіўся — без паталагічных дыягназаў.

Аднак траўмы, у тым ліку чэрапна-мазгавая, моцна паўплывалі на яго развіццё.

Зараз хлопчыку год і чатыры месяцы. Ён умее толькі сядзець і поўзаць. У нагах адчуваецца слабасць: ён не можа ўставаць і хадзіць. Нават у хадунках амаль не перасоўваецца.

Інфармацыя пра хлопчыка ўжо размешчана ў Рэспубліканскім банку даных для ўсынавіцеляў. 

• 0
• 0
• 1
• 0
• 9
• 16
• 13
• 0