ЗША заклікалі Украіну звярнуцца да ЕС наконт скасавання санкцый супраць беларускага калію
Злучаныя Штаты Амерыкі падштурхоўваюць Украіну скасаваць абмежаванні на імпарт калійных угнаенняў з Беларусі і заклікалі гэтую краіну паўплываць на еўрапейскіх саюзнікаў, каб яны зрабілі тое ж самае, паведамляе Bloomberg.

Вашынгтон аргументаваў сваю просьбу тым, што скасаванне санкцый на імпарт ключавога пажыўнага рэчыва для глебы можа дапамагчы Беларусі дыстанцыявацца ад Расіі і адчыніць дзверы для паляпшэння адносін з Мінскам.
ЗША і Еўрапейскі саюз увялі шырокамаштабныя санкцыі супраць Беларусі пасля таго, як Мінск пачаў жорсткія рэпрэсіі супраць пратэстоўцаў пасля прэзідэнцкіх выбараў 2020 года.
Абмежаванні ўзмацнілі пасля таго, як улады Беларусі падтрымалі агрэсію Расіі 24 лютага 2022 года, дазволіўшы выкарыстанне беларускай вайсковай інфраструктуры і паветранай прасторы для ўварвання расійскай арміі і абстрэлаў мірных гарадоў Украіны.
У снежні 2025 года ЗША змякчылі санкцыі супраць трох беларускіх калійных кампаній пасля вызвалення Мінскам 250 палітвязняў у межах дамоўленасцяў з ЗША. Еўрапейскія санкцыі дзейнічаюць да лютага 2027 года і могуць быць працягнуты, нагадвае Радыё Свабода.
Каментары