Іранскі ўрок. КНДР увяла аўтаматычны ядзерны ўдар у выпадку забойства Кім Чэн Ына
Паўночная Карэя ўнесла змены ў Канстытуцыю, якія абавязваюць вайскоўцаў неадкладна нанесці ядзерны ўдар у адказ, калі вышэйшы кіраўнік краіны будзе забіты або не зможа выконваць свае абавязкі ў выніку атакі, піша The Telegraph.
Штуршком для прыняцця такіх мер стала нядаўняя аперацыя ЗША і Ізраіля, падчас якой быў забіты вярхоўны лідар Ірана Алі Хаменеі і яго бліжэйшае асяроддзе. Гэтая ліквідацыя моцна напалохала Кім Чэн Ына, піша выданне.
Пхеньян убачыў «неверагодную эфектыўнасць» высокадакладных удараў і вырашыў стварыць механізм гарантаванай помсты, нават калі цэнтралізаванае камандаванне будзе знішчана.
Згодна з новай рэдакцыяй артыкула 3 закона аб ядзернай палітыцы, калі сістэма камандавання апынецца пад пагрозай, ядзерны ўдар павінен быць нанесены «аўтаматычна і неадкладна».
Асноўнай цэллю для ўдару ў адказ КНДР разглядае Злучаныя Штаты.
Адначасова з ядзернымі пагрозамі Пхеньян узмацняе звычайнае ўзбраенне. Кім Чэн Ын асабіста праінспектаваў вытворчасць новых 155‑мм самаходных гаўбіц з далёкасцю стрэлу больш за 60 км. Гэтая артылерыя павінна быць разгорнута ўздоўж мяжы ўжо ў гэтым годзе.
У зоне паражэння апынецца Сеул (які знаходзіцца ўсяго за 56 км ад мяжы) і ключавыя прамысловыя цэнтры Паўднёвай Карэі.
Пхеньян афіцыйна выкрасліў з Канстытуцыі згадкі пра мірнае аб'яднанне Карэй і цяпер адкрыта называе Сеул сваім галоўным ворагам.
Цяпер чытаюць
Айцішнік і былы палітвязень Віктар Куўшынаў прадае за 850 тысяч еўра дом у Партугаліі, які пабудаваў паўтара года таму ФОТЫ10
Каментары