Слуханні прызначаны на 10 чэрвеня.
Заснавальнік камп'ютарнага гіганта Microsoft і філантроп Біл Гейтс у чэрвені гэтага года дасць паказанні камісіі Кангрэса ЗША, якая расследуе дзейнасць асуджанага педафіла Джэфры Эпштэйна, піша Бі-бі-сі.
Кангрэсмены пацвердзілі, што яшчэ 3 сакавіка запатрабавалі ад Гейтса расказаць пра яго сяброўства з Эпштэйнам. Да гэтага перад камісіяй выступалі некалькі іншых вядомых асоб, у тым ліку былы прэзідэнт ЗША Біл Клінтан і яго жонка, экс-кіраўнік Дзярждэпа Хілары Клінтан.
Афіцыйны прадстаўнік Гейтса паведаміў Бі-бі-сі, што той «з радасцю адкажа на ўсе пытанні членаў камітэта, каб дапамагчы іх важнай працы».
Ахвяры злачынстваў Эпштэйна ніколі не вылучалі якіх-небудзь абвінавачанняў супраць Гейтса. Яго імя мноства разоў сустракаецца ў мільёнах дакументаў з «дасье Эпштэйна», апублікаванага Мінюстам ЗША, аднак само па сабе гэта не можа служыць сведчаннем якіх-небудзь незаконных або непрыстойных дзеянняў.
Мінюст апублікаваў каля трох мільёнаў дакументаў па справе Эпштэйна, а яшчэ некалькі мільёнаў застаюцца неапублікаванымі.
Што вядома пра сувязі Гейтса і Эпштэйна
Гейтс, які заснаваў Microsoft, а ў апошнія гады займаецца дабрачыннай дзейнасцю, не хавае, што некаторы час знаходзіўся з Эпштэйнам у прыяцельскіх адносінах. Пры гэтым ён настойвае, што нічога не ведаў пра яго злачынствы.
Як паведаміў яго фонд, Гейтс нядаўна правёў з гэтай нагоды сход з супрацоўнікамі сваёй арганізацыі і «прызнаў адказнасць за свае дзеянні». «Біл шчыра і падрабязна адказаў на некалькі пытанняў», — сказана ў заяве.
Паводле газеты Wall Street Journal, Гейтс прынёс прабачэнні супрацоўнікам; ён таксама прызнаў, што ў яго было два раманы з жанчынамі з Расіі — і пра гэта стала вядома Эпштэйну. Як пісала выданне, Эпштэйн спрабаваў пагражаць Гейтсу ў сувязі з адным з гэтых раманаў.
«Я не рабіў нічога незаконнага. Я не бачыў нічога незаконнага», — сказаў Гейтс сваім супрацоўнікам (паводле даных аўтараў публікацыі).
Як пісала WSJ, Гейтс расказаў супрацоўнікам фонду, што сустрэў Эпштэйна ў 2011 годзе — праз некалькі гадоў пасля таго, як той прызнаў сябе вінаватым у схіленні непаўналетняй да прастытуцыі — і дадаў, што ведаў пра нейкую «18‑месячную справу», якая накладвала абмежаванні на паездкі Эпштэйна, але не праверыў яго біяграфію належным чынам.
Раней заснавальнік Microsoft таксама каменціраваў свае сувязі з Эпштэйнам у інтэрв'ю аўстралійскай тэлекампаніі 9News. Ён сцвярджаў, што іх адносіны абмяжоўваліся сумеснымі вячэрамі, і казаў, што ніколі не быў на востраве Эпштэйна.
«Я шкадую аб кожнай хвіліне, якую я з ім правёў, і прыношу прабачэнні за тое, што гэта рабіў», — сказаў Гейтс.
У сваёй заяве для Бі-бі-сі афіцыйны прадстаўнік Гейтса сказаў, што той ніколі не браў удзелу ў сумесных вечарынках з Эпштэйнам і не быў датычны да яго незаконных дзеянняў.
Чакаецца, што ў бліжэйшыя месяцы паказанні аб сувязях з Эпштэйнам камісіі Кангрэса таксама дадуць цяперашні міністр гандлю ЗША Говард Лютнік і былы генеральны пракурор Пэм Бондзі.
Цяпер чытаюць
Раптоўна памяняўся кіраўнік Віцебскай вобласці. Прычынай назвалі хваробу 50‑гадовага Аляксандра Рагожніка4
Каментары