Minskija abmieńniki pierapoŭnienyja ludźmi: ludzi mianiajuć rubli na valutu

Da samaha viečara čerhi stajali ŭ abmiennyja punkty valutu Minsku. Zastrašanyja abvałam rasijskaha rubla, biełarusy kinulisia mianiać rubli na dalary. Akramia taho, častaj apieracyjaj była zamiena rublovaha depazita valutnym.

Za 2014 hod rasijski rubiel źniaceniŭsia da dalara ŭžo prykładna na 80%, ukrainskaja hryŭnia — na 100%, kazachstanski tenhie — na 20%. Tym časam biełaruski rubiel — tolki na 14%.

Na 1 studzienia aficyjny kurs dalara składaŭ 9520 biełaruskich rubloŭ, 17 śniežnia jon składaje 10870. Praŭda, u abmieńnikach siońnia paśla abiedu dalara pieravažna prymali pa 11000, a pradavali za 11100.

Temp devalvacyi biełaruskaha rubla sioleta prykładna supadaŭ z tempam inflacyi. Ale ŭ śviatle abvału rasijskaj i ŭkrainskaj valut — a heta asnoŭnyja handlovyja partniory Biełarusi — rubiel pačynaje zdavacca pieraacenienym.

Ekanamisty ličać, što, kali rasijski rubiel nie adyhraje svaich pazicyj, to devalvacyja i biełaruskaha rubla stanie niepaźbiežnaj. Inakš naša finansavaja sistema i pramysłovaść nie vytrymajuć.

Asacyjavany ekśpiert Daśledčaha centru Instytuta pryvatyzacyi i mieniedžmienta Źmicier Kruk skazaŭ «Našaj Nivie», što, na jahonuju dumku, Nacbank musić apieradžalna reahavać na abvał u Rasii. Na jaho dumku, kurs biełaruskaha rubla da rasijskaha musić adpaviadać tamu, jaki byŭ u pačatku hoda.

Finansavy analityk aficyjnaha partniora «Alpary» ŭ Minsku Vadzim Iosub kaža, što treba rabić biełaruski rubiel bolš hnutkim: «Hod tamu byŭ zadadzieny pryncyp kursaŭtvareńnia — kožnyja tarhi dalar ci vyrastaje na 10 rubloŭ, ci zastajecca na miescy. Hety režym nie źmianiajecca, što b vakoł krainy nie adbyvałasia.Nadyšoŭ čas ad jaho admovicca i zrabić tak, jak było zadekłaravana ŭ Asnoŭnych nakirunkach hrašova-kredytnaj palityki: kab kurs nacyjanalnaj valuty źmianiaŭsia pad upłyvam popytu i prapanovy».

U stalicy valuty ŭ vialikich abmieńnikach chapiła da viečara. U toj ža čas z rehijonaŭ dachodziać paviedamleńni, što ŭ suviazi z ažyjatažnym popytam valuty paśla abiedu nie zastałosia. Toje samaje i ŭ małych abmieńnikach u Minsku: ludzi hadzinami čakali, pakul niechta zdaść dalary ci jeŭra.

Dalejšaje raźvićcio situacyi budzie zaležać ad viestak z Maskvy, ad krokaŭ Nacbanka Biełarusi i ad najaŭnaści ŭ jaho reziervaŭ, kab pahasić ahoń paniki valutnymi interviencyjami.

• 0
• 0
• 0
• 0
• 0
• 0
• 0
• 0