Teołah, blizki da patryjarcha Kiryła, rezka krytykuje namier BPC prasić samakiravanaści
«Jak možna na takim vysokim uzroŭni prymać zvarot u parušeńnie asnovatvornych kananičnych pastanovaŭ, jaki prosta pa pracedurnych mierkavańniach navat nie moža być razhledžany!» — zajaviŭ teołah Arkadzij Maler ahienctvu «Interfaks-Relihija» u čaćvier.
Nahadajem, što na dniach mitrapalit Minski i Zasłaŭski Pavieł — nie biełarus, pryznačany ŭ Minsk hod nazad patryjarcham Kiryłam — zajaviŭ ab namiery chadajničać pierad patryjarcham ab nadańni Biełaruskaj pravasłaŭnaj carkvie statusu samakiravalnaj Carkvy ŭ składzie Maskoŭskaha patryjarchatu pa ŭzory Łatvii, Małdovy i Estonii. Što pakazalna, jeparchijalny schod sustreŭ hetyja jaho słovy avacyjaj.
Hety namier byŭ u peŭnaj stupieni siensacyjaj. Pakazalna, što adnačasova stała viadoma, što mitrapalit Pavieł pierasialiŭsia ŭ dziaržaŭnuju rezidencyju Drazdy, dzie žyvie najvyšejšaja dziaržaŭnaja namienkłatura.
Maler nahadaŭ, što, zhodna sa statutam Ruskaj pravasłaŭnaj carkvy, tolki ahulnacarkoŭnamu «Pamiesnamu Saboru naležyć vyšejšaja ŭłada ŭ Ruskaj pravasłaŭnaj carkvy ŭ pytańniach … nadańnia aŭtakiefalii, aŭtanomii abo samakiravańnia častkam Ruskaj pravasłaŭnaj carkvy».
Maleru taksama niezrazumieła, čamu prapanavanaja da publičnaha abmierkavańnia inicyjatyva supała pa časie «z šeraham vostra afarbavanych ŭ adnosinach da Rasii zajavaŭ biełaruskaha kiraŭnictva».
«Na žal, heta navodzić na dumki ab mahčymym cisku z boku dziaržavy», — zajaviŭ Maler.
«U lubym vypadku, — praciahnuŭ jon, — što b ni adbyvałasia ŭ miždziaržaŭnych adnosinach, archijarejam i śviataram Ruskaj pravasłaŭnaj carkvy, u jakoj by jany krainie ni ažyćciaŭlali svajo słužeńnie, niedarečna vystupać z pazicyi palityčnaha spojlera dziejučaj ułady».
U ciapierašni čas Biełaruskaja carkva maje status ekzarchata. Ekzarch i archijerei pryznačajucca Maskvoj.
U toj ža čas status samakiravanaj Carkvy ŭ składzie RPC majuć małalikija Łatvijskaja, Estonskaja cerkvy, utraja mienšaja za biełaruskuju Małdaŭskaja carkva, a małalikija Kitajskaja, Japonskaja cerkvy majuć status aŭtanomnych.
Ukrainskaja pravasłaŭnaja carkva Maskoŭskaha patryjarchata maje status samakiravanaj z pravami šyrokaj aŭtanomii. I tolki biełarusy ničoha nie majuć, bo na pačatku 90-ch, kali inšyja cerkvy brali samastojnaść, u Minsku mitrapalitam byŭ vychadziec z Maskvy Fiłaret, jaki supraciŭlaŭsia hetamu pracesu.
Ciapier čytajuć
18‑hadovy kursant Vajskovaj akademii ź Lachavič nikomu ničoha nie skazaŭ, zabraŭ dakumienty i pajechaŭ vajavać za Rasiju. Ciapier pa im płačuć18
Kamientary