Kryminalnaja sprava zaviedziena ŭ Biełarusi na jašče adnaho padazravanaha va ŭdziele ŭ farmiravańniach DNR
Suprać byłoha žychara Salihorska Ihara Ščuki zaviedzienaja kryminalnaja sprava za ŭdzieł u bajavych dziejańniach na terytoryi inšaj dziaržavy. 23 lutaha pa miescy jaho prapiski ŭ Salihorsku prajšoŭ pieratrus, piša jon na svajoj staroncy Ukantakcie.
«Ničoha nie skanfiskavali, ale mama ŭ panicy», — adznačaje jon.
Kryminalny kodeks Biełarusi praduhledžvaje pa artykule «najmictva» pakarańnie ad troch da siami hadoŭ pazbaŭleńnia voli.
Sam Ščuka śćviardžaje, što niepasrednaha ŭdziełu ŭ bajavych dziejańniach jon nie braŭ, a zajmaŭsia vałanciorskaj dziejnaściu. Na jaho staronkach u sacsietkach niama fota sa zbrojaj u bajavoj abstanoŭcy.
U toj ža čas Ščuka braŭ aktyŭny ŭdzieł u vuličnaj masoŭcy padčas zachopu Kryma i Uschodniaha Danbasa.
Pavodle źviestak MUS Biełarusi, usiaho ŭ bajavych dziejańniach na ŭschodzie Ukrainy zahinuła 8 biełarusaŭ.
Publična paviedamlałasia pra 4 vypadki. Za Ukrainu zahinuŭ bieraściejec Aleś Čarkašyn, jašče troje biełarusaŭ zahinuli, vajujučy na baku bajevikoŭ. Chto astatnija 4 čałavieki, nie ahučvałasia. Možna mierkavać, što heta taksama bajeviki DNR i ŁNR.
Usiaho pravaachoŭnyja struktury Biełarusi vyjavili niekalki dziasiatkaŭ padazravanych va ŭdziele ŭ bajavych dziejańniach va Ukrainie. Tak, uradženiec Mastoŭskaha rajona z pazyŭnym Mantana paśla viartańnia ŭ Biełaruś chvaliŭsia adnaviaskoŭcam, što ŭłasnaručna zabiŭ 20 ukraincaŭ! Raniej za svaje 22 hady biełarus mieŭ až 5 sudzimaściaŭ za kradziažy. Na radzimie Mantana vierbavaŭ u ŁNR adnakłaśnika, jakomu abiacaŭ štomiesiačny zarobak u pamiery 300 dalaraŭ, a taksama mahčymaść zajmacca maradziorstvam i zabirać rečy zahinułych.
Jašče adzin bajavik ŁNR — 38-hadovy ŭradženiec Vaŭkavyska z pazyŭnym Harynyč. Jon maje piać sudzimaściaŭ, u tym liku za zabojstva. Hety čałaviek, chutčej za ŭsio, narkaman.
«Ciapier naša meta abiasškodzić, zaklikać da adkazu bajevikoŭ, jakija viartajucca z Ukrainy. Jany nie pavinny ŭžyć svaje navyki ŭ intaresach ekstremistaŭ i kryminalitetu, — zajaviŭ pradstaŭnik Ministerstva ŭnutranych spraŭ Biełarusi. — Prablemu nielha niedaaceńvać. Bo havorka idzie pra biaśpieku i prestyž našaj krainy, jakaja zavajavała tryvałuju reputacyju niejtralnaj, miralubnaj dziaržavy, stabilnaj placoŭki dla pieramoŭ pa ŭrehulavańni łakalnaha kanfliktu. Usiu hetuju hrymučuju sumieś z raznamasnych destruktyŭnych elemientaŭ treba paśpieć pahasić», — skazaŭ supracoŭnik MUS.
Ciapier čytajuć
Čamu amierykancy tak irvucca na Miesiac, što tam buduć zdabyvać? I što da taho biełarusam? Tłumačyć biełaruski astrafizik1
Kamientary