U Biełarusi pačnuć vypuskać kaŭbasu i tušonku z babra
Ideja zapuścić u vytvorčaść tušu hryzuna źjaviłasia ŭ Ministerstva lasnoj haspadarki. Pryčyn niekalki. Pa-pieršaje, babroŭ u nas chapaje, pa-druhoje, ich miasa vielmi karysnaje. Spačatku vypuskać takuju kaŭbasu i tušonku płanujuć u abmiežavanaj kolkaści. Dalikates, kažuć śpiecyjalisty, dla hurmanaŭ.
— Raniej babra vykarystoŭvali dla narychtoŭki futra, ale moda źmianiłasia, i zaraz škury hetaha hryzuna nieaktualnyja, — raspaviadaje Siarhiej Šastakoŭ, načalnik adździeła palaŭničaj haspadarki Minlashasa. — My vyrašyli vykarystać jaho pa-inšamu. Padčas adnaho ź vizitaŭ našaj delehacyi ŭ Litvu nas pačastavali šašłykom. My dumali, jon z baraniny, akazałasia, babior. Pry pravilnaj padrychtoŭcy i sa śpiecyjami jon vielmi smačny.
Śpiecyjalisty Minlashasa pakaštavali babra jašče ŭ 2015 hodzie, ale techničnych umoŭ dla narychtoŭki, apracoŭki i pastaŭki takoha miasa ŭ handlovuju sietku našaj krainy nie było. Tyja ž palaŭničyja, naprykład, mahli vykarystoŭvać tušu źviera tolki ŭ asabistych metach. U ministerstvie prapanavali vypravić situacyju. Za spravu ŭziaŭsia Instytut miasa-małočnaj pramysłovaści.
Padčas daśledavańniaŭ vyśvietliłasia, što ciahlicavaja tkanka babra źmiaščaje šmat białku, sielen i navat vitamin S. Pa kolkaści fosfaru jana pieraŭzychodzić jałavičynu, śvininu i nabližajecca da trusa. A žaleza ŭ im amal udvaja bolš, čym u inšych vidach miasa.
— Nizkaje ŭtrymańnie tłušču robić babra prydatnym dla dyjetyčnaha charčavańnia. Adznačajecca jaho dobraja zasvajalnaść, — praciahvaje Siarhiej Šastakoŭ. — Miasa maje dobryja smakavyja jakaści i karystajecca papularnaściu ŭ restaranach Litvy, Polščy.
Ciapier na padstavie raspracavanych techničnych umoŭ tuša babra moža iści na pierapracoŭku. Ź jaje, kažuć śpiecyjalisty, mohuć rabić i kaŭbasu, i tušonku.
— Ciapier my prapracoŭvajem hetyja pytańni ź miasakambinatami, — raspaviadaje načalnik adździeła palaŭničaj haspadarki. — Vielmi mnohija vytvorcy cikaviacca.
Akazałasia, kuplać tušy babra hatovyja i handlovyja sietki. Cana pytańnia roŭnaja koštu kiłahrama trusa. Adnak pa techničnych umovach takoje miasa moža iści tolki na pierapracoŭku, i na palicy pavinna pastupać tolki hatovaja pradukcyja.
— U hetym hodzie my ŭžo navat daviali da svaich palaŭničych haspadarak płany pa narychtoŭcy babra dla nastupnaj realizacyi, — udakładniaje surazmoŭca. — U 2016—2017 hadach heta 1750 asobin.
— Nie nadta šmat.
— Akramia nas jość šmat inšych palaŭničych, u jakich my možam zakuplać babra i pieradavać jaho na pierapracoŭku, — tłumačyć Siarhiej Šastakoŭ. — U siarednim u hod pa krainie zdabyvajuć kala dziesiaci tysiač babroŭ, ale zakupki ŭ nas pakul tolki ŭ płanach. Ciapier važna, kab usio zrušyłasia ź miortvaj kropki, bo vielmi šmat patrabavańniaŭ da miasa z boku vieterynarnaj słužby.
Kali dakładna na pryłaŭkach mahazinaŭ źjavicca babrovaja kaŭbasa i tušonka, u Minlashasie nie havorać. Mahčyma, da kanca hoda. Tolki ŭdakładniajuć: palavać na hryzuna možna tolki z 1 vieraśnia pa 31 sakavika.
— U miasakambinataŭ taksama jość cikavaść da našaj dzikaj ptuški. Imavierna, budzie raspracoŭvać techničnyja ŭmovy dla ich, — reziumuje Siarhiej Šastakoŭ. — Zapatrabavanaść hetaha praduktu nazirajecca ŭ krainach ES. Naprykład, na kruiznym łajniery 240-hramovy słoik tušonki ź dzičyny kaštuje piać jeŭra i karystajecca popytam.
Kamientary