Chto zapłaciŭ rasijskamu błohieru Varłamavu za rekłamu vybaraŭ u Kaardynacyjnuju radu?

Pytańnie pra finansavańnie rekłamy ŭ rasijskaha błohiera Illa Varłamava było ŭźniata 16 maja ŭ Varšavie na zakrytaj panelnaj dyskusii, pryśviečanaj vybaram u KR. Arciom Bruchan paviedamiŭ, što heta zrabili mižnarodnyja partniory Kaardynacyjnaj rady.

— Partniory znajšli niejkuju arhanizacyju abo kahości, chto faktyčna zamoviŭ rekłamu ŭ Varłamava, nakolki ja viedaju, — rastłumačyŭ jon.

Vice-śpikierka KR Lizavieta Prakopčyk dadała, što dakładnaj infarmacyi ŭ jaje niama.

— U nas nie było nijakich źviestak ni pra toje, kolki heta kaštavała, ni pra toje, da kaho jany buduć źviartacca. To-bok my nie viedajem, my tolki zdahadvajemsia, — skazała Prakopčyk.

Žurnalist udakładniŭ u Arcioma Bruchana, pra jakich mienavita mižnarodnych partnioraŭ idzie havorka i jakaja ich forma — fondy ci dziaržaŭnyja struktury.

— Ja ciapier nie mahu skazać, bo treba ŭzhadnić heta z hetymi partniorami, ci chočuć jany, kab ich nazyvali. Ja tak razumieju, heta fondy, tak, — adkazaŭ Bruchan.

Lizavieta Prakopčyk udakładniła: «Donary».

Bruchan padkreśliŭ, što rašeńnie pra zakaz rekłamy było pryniataje partniorami samastojna, bieź niepasrednaha ŭdziełu Kaardynacyjnaj rady.

— Ja chacieŭ by dadać, što partniory sami prymajuć rašeńni. Dumaju, jany mahli kansultavacca z našaj miedyjahrupaj. Ale tak ci inakš, jany sami prymali kančatkovaje rašeńnie. Jany zachacieli prarekłamavać. Heta nie Kaardynacyjnaja rada atrymała hrošy. Heta było ich rašeńnie, jakim čynam rekłamavać, — rastłumačyŭ śpikier.

Žurnalist «Lusterka» taksama pacikaviŭsia, ci nie byli heta hrošy z pakieta dapamohi 30 miljonaŭ jeŭra, vydzielenaha Jeŭrakamisii na padtrymku biełaruskaj hramadzianskaj supolnaści ŭ 2026 hodzie.

— Viadoma, nie. Heta ja nie mahu kamientavać, ja nie viedaju, — adkazaŭ Bruchan.

Pavodle prajs-lista, raźmieščanaha na aficyjnym sajcie Illi Varłamava, košt rekłamy ŭ jaho prajektach varjirujecca.

Naprykład, intehracyja praciahłaściu 60—120 siekund na jaho asnoŭnym YouTube-kanale kaštuje 9800 dalaraŭ, a anałahičny słot u niadzielnym vypusku navin «Čio proischodit» — 12 300 dalaraŭ. Śpiecprajekt abydziecca zakazčyku ŭ 55 650 dalaraŭ.

Varta adznačyć, što ŭ kamientaryjach da prajs-lista paznačana, što ŭsia rekłama markirujecca, a ceny «pryviedzieny daviedačna».

Vybary ŭ Kaardynacyjnuju radu čaćviortaha sklikańnia prachodziać z 11 pa 19 maja. Pa stanie na 15:20 suboty, udzieł u hałasavańni ŭziali 1260 čałaviek.

Na minułych vybarach, u KR treciaha sklikańnia, dva hady tamu ŭ hałasavańni ŭziali 6723 čałavieki.

• 2
• 0
• 0
• 7
• 0
• 0
• 0
• 0