Štotydzień my dzielimsia z vami tałkovymi profilami. Dla natchnieńnia i nie tolki.
Niahledziačy na toje, što abiedźvie adukacyi Voli Kuźmič dalokija ad mastactva (miechanika-matematyčny fakultet BDU i prava ŭ Ekanamičnym univiersitecie), jana znajšła siabie mienavita ŭ ilustracyjach i animacyi.
Vola Kuźmič.
Heta jaje malunki vy mahli bačyć u kalekcyi «Jak čujecca — tak i malujecca», vuličnym art-prajekcie Freedom on Paper i na šmatlikich paštoŭkach z nacyjanalnym kałarytam, u telerekłamie, na sajtach i ŭ mabilnych dadatkach.
Ciapier jana ilustruje knihu «Kazki staroha Adamkova» Natałki Charytaniuk pra dziciačyja pryhody ŭ starym Bieraści.
Vola naradziłasia «ŭ sercy kłubničnaha rehijona», na Łuninieččynie. Jaje baćki, jak kaža jana sama, ludzi ziamli. Usio jaje dziacinstva prajšło ŭ vioscy. Dla jaje Paleśsie i rodny dvor — heta miesca siły, tamu jana byvaje tam kožny siezon i tady «instahram z budniaŭ ilustratara i lifestyle-błohu pieratvarajucca ŭ naŭprostyja ŭklučeńni z paleskaj vioski».
Niadaŭna z nahody 90-hodździa baby Dusi Vola namalavała siamiejny radavod, ź jakoha bačna, što ad babulinaha kachańnia źjavilisia bolš za 60 čałaviek. Pahladzicie, jaki cud!
Akramia čaroŭnych pracoŭnych momantaŭ i budniaŭ paleskaj vioski, u instahramie Voli možna sačyć za tym, jak raście jaje syn Leŭ.
«Naradžeńnie syna amal nie źmianiła moj pracoŭny rytm, chiba što paskoryła jaho. Nibyta dadałosia novaje vymiareńnie. Ja vielmi radaja, što mahu i pracavać, i hadavać dziciaci, i raści prafiesijna. Pakul Leŭ maleńki, asabliva chočacca być razam ź im, nazirać, jak jon mianiajecca, raście. Syn časta pobač, kali ja ładžu prezientacyi, majstar-kłasy, a časam moža raptoŭna «dałučycca» da pracoŭnaj anłajn-kanfierencyi», — raskazvaje Vola.
Ciapier čytajuć
Palitviazień raskazaŭ, jak zvyčajnyja kryminalniki abjavili haładoŭku, kab palepšyć umovy ŭtrymańnia palityčnych3
Kamientary