Chto zamianiŭ skandalna źniataha Vaŭka: piać faktaŭ pra novaha ministra pramysłovaści Paŭła Uciupina
18 žniŭnia stała viadoma, chto stanie novym ministram pramysłovaści. Heta 41-hadovy čynoŭnik Pavieł Uciupin. Jon sieŭ na pasadu zamiest Vitala Vaŭka, jakoha sa skandałam źniali paśla vizitu Łukašenki ŭ Oršu.
«Naša Niva» vyśvietliła, što viadoma pra novaha ministra.
Dźvie Radzimy: Biełaruś i Rasija
Uciupin naradziŭsia 17 śniežnia 1976 hoda ŭ vioscy Papoŭka Charolskaha rajona Prymorskaha kraja (heta Daloki Uschod Rasii). U pieršy kłas Pavieł pajšoŭ u susiedniaje siało. Ale nadoŭha tam nie zatrymaŭsia — baćka, Uładzimir Uciupin, byŭ vajskoŭcam. Uvohule karani Uciupinych u Rasii, u horadzie Kurhanie, tam i pa siońnia žyvuć svajaki. Ale siamja vajskoŭca šmat pierajazdžała pa SSSR, u vyniku asieli Uciupiny ŭ Barysavie.
Paśla Pavieł Uciupin kazaŭ u intervju haziecie «Viačerni Babrujsk», što ŭ jaho dźvie radzimy: Biełaruś i Rasija.
U Barysavie baćki Uciupina žyvuć i pa siońnia. Tam Pavieł skončyŭ miascovuju himnaziju i vyrašyŭ pastupać u Minsk.
Maci Paŭła pracavała nastaŭnicaj pačatkovych kłasaŭ. U Paŭła jość i rodnaja małodšaja siastra, Kryścina. Siońnia jana juryskonsult.
Sam maleńki Pavieł chacieŭ stać vajskoŭcam, jak i baćka, raspaviała «Našaj Nivie» maci Luboŭ Uciupina. Ale paśla Pavieł vyrašyŭ usio ž iści ŭ ekanamisty.
«Syn skončyŭ himnaziju sa srebranym miedalom. Paśla dumaŭ, kudy pastupać. Ale nakont budučyni raiŭsia bolš z baćkam, nie sa mnoj, — skazała maci novaha ministra. — Sa mnoj Pavieł i svaju pracu nie abmiarkoŭvaŭ, asabliva ničoha nie raskazvaŭ».
Siońnia Pavieł Uciupin padtrymlivaje blizkija znosiny z baćkami, časta naviedvaje Barysaŭ. «Jany z žonkaj i dziećmi pryjazdžajuć da nas na ŭsie śviaty», — kaža Luboŭ Uciupina.
Zrabiŭ imklivuju karjeru
Paśla barysaŭskaj himnazii Pavieł Uciupin pastupiŭ na fakultet mižnarodnych ekanamičnych adnosinaŭ Biełaruskaha dziaržaŭnaha ekanamičnaha univiersiteta. «Pieršy kurs advučyŭsia zavočna i za hety čas nabyŭ vopyt raboty na pradpryjemstvach. Na apošnim kursie aśpirantury mnie stała viadoma, što šukajuć kandydaturu na pasadu daradcy staršyni Mahiloŭskaha abłvykankama. U asnoŭnym šukali ź inšaharodnich, bo minčanie, naturalna, staralisia zastacca ŭ stalicy. Spynilisia na mnie. U 25 hadoŭ ja zaniaŭ pasadu daradcy, praz dva hady staŭ hałoŭnym daradcam. Adtul praz čatyry hady pierajšoŭ na pasadu namieśnika hienieralnaha dyrektara AAT «Biełšyna», — raskazvaŭ Uciupin «Viačerniamu Babrujsku».
Pryčym Uciupin pryznavaŭsia, što bajaŭsia nie dać rady. Maŭlaŭ, raniej, i na pasadzie daradcy taksama, jon zajmaŭsia ekanamičnymi pytańniami, vopytu kiravańnia nie mieŭ. Dumaŭ nad prapanovaj z «Biełšyny» bolš za miesiac, ale ŭ vyniku pahadziŭsia.
Ale pierad dziaržsłužbaj i «Biełšynaj» małady Uciupin paśpieŭ papracavać na pradpryjemstvach na dobrych pasadach. Byŭ namieśnikam dyrektara pa źniešnieekanamičnych suviaziach pradpryjemstva «Dubl V», načalnikam adździeła źniešnieekanamičnych suviaziaŭ vytvorča-kamiercyjnaj firmy «UTV», ekanamistam płanava-ekanamičnaha adździeła sumiesnaha pradpryjemstva «Frebar» u Barysavie.
Baćka i dobry haspadar
Padčas vučoby na apošnim kursie BDEU Pavieł paznajomiŭsia z budučaj žonkaj. Pieršakurśnica ź niezvyčajnym imiom Aleksandryna, była rodam z Novałukomla. U 2005 hodzie Pavieł i Aleksandryna ažanilisia. U tym ža hodzie Uciupin pačynaje vučobu ŭ Akademii prezidenta.
Siońnia Aleksandryna Uciupina pracuje na MAZie. Uciupiny hadujuć dvaich dziaciej, starejšaj dačce Safii — 12 hadoŭ. Synu Andreju — 10.
«Na rybałku ź siabrami vybirajusia, ale kab na pastajannaj asnovie — nie. U mianie fanatyčnaja cikavaść da techniki, jość mnostva miechanizmaŭ dla viadzieńnia chatniaj haspadarki — dryli, frezy, pierfaratary, elektrałobzik… Adna sprava pravodku pravieści z dapamohaj abcuhoŭ, a inšaje — chutka praštrabić ścianu dla provada. Starajusia elektrainstrumienty svoječasova dakuplać: kab, kali niešta złamajecca, było naŭzamien. Uvieś ramont u domie, za vyklučeńniem prafiesijnych rabot, na mnie», — raskazvaŭ pra svajo chatniaje žyćcio Pavieł Uciupin.
Viedaje Minpram znutry
U 2008 hodzie Uciupin byŭ abrany členam Savieta Respubliki ad Mahiloŭskaj vobłaści.
Paśla «Biełšyny» Uciupin viarnuŭsia ŭ čynoŭnictva. Jon zaniaŭ pasadu namieśnika ministra pramysłovaści ŭ listapadzie 2011 hoda. Pravioŭšy ŭ Minpramie amal 6 hadoŭ, u 2017 hodzie Uciupin byŭ pryznačany namieśnikam ministra ekanomiki. Jon zajmaŭsia ŭ tym liku i zamiežnymi inviestycyjami ŭ Biełaruś, niaredka byvaŭ u Kitai.
Pryvatyzacyi čakać nie varta
Jak małady ministr budzie kiravać pramysłovaściu, pakul nieviadoma. Łukašenka adznačaŭ, što adnoj z pryčyn vybaru Uciupina źjaŭlajecca ekanamičny dośvied čynoŭnika.
Ale ž papularnaja teoryja, što biełaruskija dziaržpradpryjemstvy vyratuje tolki pryvatyzacyja, naŭrad ci budzie ažyćciaŭlacca na praktycy. Bo heta nie zaležyć ad ministra. Dziaržaŭnaja palityka — rasprodažu nie budzie i kropka.
«My admovilisia i ad masavaha rasprodažu dziaržaŭnaj majomaści. Vopyt našych susiedziaŭ, jakija praviali takuju pryvatyzacyju, demanstruje šerah doŭhaterminovych niehatyŭnych nastupstvaŭ, jakija pieraviešvajuć karotkaterminovyja finansavyja vyhady. U apošnija hady pryvatyzacyja ŭ Biełarusi ažyćciaŭlałasia kropkava, pry najaŭnaści stratehičnaha inviestara, nacelenaha na raźvićcio pradpryjemstva, pavyšeńnie jaho prybytkovaści i koštu aktyvaŭ. Tak, jaje tempy prykmietna źnizilisia, ale heta nie aznačaje adsutnaści pryvatyzacyjnaj palityki», - kazaŭ Uciupin u intervju BIEŁTA.
Taksama čynoŭnik pazityŭna vykazvaŭsia nakont stvareńnia Mytnaha sajuza i spadziavaŭsia, što ŭ budučyni ŭ im źjaviacca i novyja krainy.
U 2017 hodzie Uciupin kazaŭ, što masavych zvalnieńniaŭ i skaračeńniaŭ na dziaržpradpryjemstvach čakać taksama nie varta. Maŭlaŭ, u nas usio ž «sacyjalna-aryjentavanaja dziaržava».
Tamu, chutčej za ŭsio, radykalnych źmienaŭ nie budzie. Uciupin praciahnie «pamiarkoŭnaje» kiravańnie halinoj. Varta adznačyć, małady čynoŭnik nikoli nie bajaŭsia pryznavać najaŭnaść prablem. Ale ž pryznavać prablemy — adna sprava, a vyrašać ich i nieści za heta poŭnuju adkaznaść — zusim inšaja.
Kamientary