«Ludzi daviedzienyja da kropki». Zvolnienaja Volha Brycikava — pra stačku i nastroi na «Naftanie»

3 śniežnia, u načalnika adździeła realizacyi naftapraduktaŭ AAT «Naftan» i aktyvistki Volha Brycikavaj byŭ apošni pracoŭny dzień. Napiaredadni jaje zvolnili, papiarednie pazbaviŭšy dostupu da dziaržaŭnaj tajamnicy. Paśla hetaha na pradpryjemstvie rušyli sychody niekalkich rabotnikaŭ u stačku. Na dumku Volhi Brycikavaj, jany mohuć być źviazanyja ź jaje zvalnieńniem, ale asnoŭnaja pryčyna — cisk z boku kiraŭnictva, jaki ŭzmacniajecca, piša Tut.by.

Pra siabie Volha kaža, što «niejkich jaskravych źmienaŭ u žyćci pakul nie adbyłosia».

— U pieršuju čarhu treba ŭśviadomić, što možna zrabić sa zvalnieńniem, jakoje, jak my ličym, nie było aformlena naležnym čynam. Ja dumaju, niejki čas my na heta vydatkujem, — kaža Volha. — Raźbiracca z hetym pytańniem ja budu z dapamohaj niezaležnaha prafsajuza, bo heta toj prafsajuz, jaki abaraniaje. I jašče płanuju, jak i raniej, zastavacca na suviazi i dapamahać rabotnikam, jakija ciapier sutykajucca ź ciskam z boku načalstva. Dumaju, usio heta pakul budzie zajmać uvieś moj čas i siły.

Ab pošuku novaj pracy Volha pakul nie dumała, jak i pra toje, kab źjechać za miažu.

— Adnaznačna chaču skazać, što ja nie źbirałasia i nie źbirajusia źjazdžać. Heta moža stać tolki niejkaj vymušanaj mieraj, i siońnia ja hetuju mieru nie razhladaju. Biełaruś — maja radzima, i ja chaču žyć i pracavać tut. I ja vieru, što heta mahčyma, — tłumačyć Volha. 

Zvalnieńnie Volhi Brycikavaj — nie adzinaja padzieja na pradpryjemstvie za apošnija dni. Tak, pavodle tielehram-kanała «Stačka Naftana», 3 i 4 śniežnia ab sychodzie ŭ stačku abviaścili niekalki daśviedčanych rabotnikaŭ pradpryjemstva: ślesar avaryjnych adnaŭlenčych rabot Mikałaj Zielankievič (7 hadoŭ stažu), juryskonsult Alaksandr Kapšul (20 hadoŭ stažu), apieratar technałahičnych ustanovak Siarhiej Skiba (17 hadoŭ stažu), apieratar technałahičnych ustanovak Aleh Kuncevič (17 hadoŭ stažu). Taksama ŭ stačku syšli aparatčyk zavoda «Palimir» Andrej Škirenka (30 hadoŭ stažu) i rabotnica AAT «Połack Škłovałakno» Ludmiła Kalada (10 hadoŭ stažu).

Volha miarkuje, što jaje zvalnieńnie taksama mahło ŭzmacnić stačačnuju aktyŭnaść, ale ŭ pieršuju čarhu, na jaje dumku, heta było vyklikana tym, što «vyjścia niama, a cisk uzmacniajecca, tamu ŭzmacniajucca i takija nastroi».

— Navapołack — nievialiki horad, «Naftan» — horadaŭtvaralnaje pradpryjemstva, u mnohich siemjach niekalki pakaleńniaŭ pracavali na «Naftanie». Tak i ŭ majoj siamji, i ŭ maich kalehaŭ. Toje, što z nami adbyvajecca ciapier, jak z nami majuć znosiny niepasrednyja kiraŭniki i kiraŭniki bolš vysokaha ranhu, — heta cisk zychodzić ad ludziej, ź jakimi ty pracavaŭ i znachodziŭsia pobač doŭhi čas.

Da žniŭnia 2020 hoda nie było prablem, a ciapier za hramadzianskuju pazicyju pačynajucca niejkija razborki na prafiesijnym uzroŭni. Treba niejkim čynam padzialać hetyja rečy. Čałaviek, jaki maje hramadzianskuju pazicyju i byŭ prafiesijanałam da žniŭnia, i ciapier zastajecca prafiesijanałam, prosta da jaho źmianiłasia staŭleńnie. Dumaju, što heta i pravakuje sychod u stačku. Stačka — heta akt hramadzianskaha niepadparadkavańnia. Ludzi daviedzieny da niejkaj krajniaj kropki, i adzin z vychadaŭ, a časam i adziny vychad — heta mienavita stačka. Tak što my ŭsie budziem praciahvać ruch napierad.

• 0
• 0
• 0
• 0
• 0
• 0
• 0
• 0