«Kanstytucyjny dyjałoh»: Kastusiova z Čeračniem zaprasili ŭ Saviet Respubliki pasłuchać dakłady studentaŭ 2-ha kursa
U paniadziełak u Saviecie Respubliki pad vyhladam «dyjałohavaj placoŭki» adbyłosia mierapryjemstva z zajaŭlenaj temaj «Kanstytucyjnaja reforma i partyjnaje budaŭnictva».
Miarkujučy z prahramy, jakaja jość u «Našaj Nivy», centralnaj padziejaj «dyjałohavaj placoŭki» stali… tematyčnyja vystupleńni druhakurśnikaŭ jurfaka BDU, aktyvistaŭ «Moładzievaha siektaru pry Respublikanskim sajuzie jurystaŭ».
Try takija dakładčyki vystupili pierad aŭdytoryjaj paśla vitalnaha słova Siarhieja Siŭca — staršyni kamisii pa zakanadaŭstvie Pałaty pradstaŭnikoŭ.
Dakłady zasłuchali lidar partyi BNF Ryhor Kastusioŭ, staršynia partyi BSDH Siarhiej Čeračań, jahony pamočnik na vybarach Vadzim Mažejka, a taksama roznaha rodu profilnyja ekśpierty: prafiesar kafiedry ekałahičnaha i ahrarnaha prava Siarhiej Bałašenka, staršyni ŭsiemahčymych «kamisij» «moładzievaha parłamienta», pamočniki členaŭ Savieta Respubliki.
Paśla «vystupleńnia inšych udzielnikaŭ», jakich nie paličyli patrebnym navat prapisać asobna, znoŭ z zaklučnym słovam vystupiŭ Siviec.
«Naša Niva» źviarnułasia da kiraŭnika BNF Ryhora Kastusiova z prośbaj patłumačyć, u čym sens jahonaha ŭdziełu ŭ padobnych mierapryjemstvach.
«Viadoma, vystupleńni studentaŭ byli dziciačyja, jany začytali refieraty ab źmienach u Kanstytucyju, nie pamiataju ŭsie prapanovy, ale niechta ličyć što treba asobna prapisać pravy ludziej z abmiežavanymi mahčymaściami», — tłumačyć Kastusioŭ.
Svoj prychod Kastusioŭ patłumačyŭ asabistym zaprašeńniem ad Siŭca i patrebaj danosić pazicyju da lubych ludziej ź sistemy.
«Paśla vystupleńnia studentaŭ my pierajšli da niejkich realnych prapanovaŭ i abmierkavańnia prablem. Ja zaznačyŭ, što hety «Usiebiełaruski narodny schod» — nielehitymny, tudy nikoha nie abirajuć, tudy pryznačajuć. Dziejučaja Kanstytucyja nie vykonvajecca, nidzie nie prapisana, što siłavyja struktury mohuć užyvać hvałt da demanstrantaŭ, partyja BNF pad pahrozaj likvidacyi, na našaha siabra zaviedziena kryminalnaja sprava i hetak dalej», — skazaŭ Kastusioŭ, reziumavaŭšy, što možna było i nie chadzić, ale jon vyrašyŭ schadzić.
Ciapier čytajuć
«My dajom Štatam toje, što jany chočuć». Rasijski kanał apublikavaŭ videa, jakoje nazyvajuć zapisam Ryžankova schavanaj kamieraj u mašynie14
Kamientary