Navukoŭcy ź Niderłandaŭ pačali vyroščvać śloznyja załozy
Daśledčyki ź Niderłandaŭ pačali vyroščvać mini-orhany, jakija mohuć płakać. Vyroščvańnie śloznych załoz sa stvałovych kletak paspryjaje daśledavańniam parušeńniaŭ, źviazanych sa ślazami.
Kali navukoŭcy pačynali raspracoŭvać technałohiju vyroščvańnia orhanaŭ, jany pačali z kišačnika. Daśledčyki ŭziali stvałovyja kletki ŭnutranaj abałonki kišačnika i z dapamohaj białkoŭ, jakija nazyvajuć faktarami rostu, pačali stymulavać rost kletak. U vyniku atrymaŭsia mini-orhan, jaki mieŭ usie kletki, nieabchodnyja dla stravavańnia.
Heta było jašče ŭ 2009 hodzie. Z taho času navukoŭcy vyraścili mini-viersii piečani, padstraŭnikavaj załozy i navat atrutnyja załozy źmiej. A letaś daśledčyki vyrašyli pracavać nad śloznymi załozami, paviedamlaje The Guardian.
Śloznyja załozy vypracoŭvajuć vadkaść, jakaja abaraniaje vočy ad razdražnialnika i infiekcyj. Załozy pačynajuć vypracoŭvać ślozy, kali reahujuć na adrenalin.
Paśla paśpiachovaha vyroščvańnia śloznych załoz myšej daśledčyki ŭziali častku čałaviečaj tkanki. Kali mini-orhany atrymlivali faktary rostu, jany amal nie reahavali na adrenalin i tamu nie vypracoŭvali ślozy. Adnak paśla taho, jak navukoŭcy spyniali rost kletak, adrenalin chutka pačaŭ vyklikać ślozy z vyraščanych załoz.
Heta madel maje peŭnyja abmiežavańni. Takija załozy nie źjaŭlajucca častkaj čałaviečaha cieła, tamu adsutničajuć myšcy i kryvianosnyja sasudy, što abmiažoŭvaje ich funkcyjanavańnie.
Adnak takuju madel mohuć vykarystoŭvać daśledčyki, kab vypraboŭvać leki suprać parušeńniaŭ i zachvorvańniaŭ, źviazanych sa ślazami. Taksama aŭtary miarkujuć, što vyraščanyja załozy možna budzie ŭ budučyni transpłantavać tym ludziam, u jakich jany nie funkcyjanujuć.
Ciapier čytajuć
Masavyja aryšty aficeraŭ prajšli na avijabazie ŭ Mačuliščach — abvinavačvajuć u suviaziach z apazicyjaj46
Kamientary