Mielicina Staniuta: Učora ja atrymała dźvie admovy ŭ pracy praz moj biełaruski pašpart. Ale heta ŭžo nie maje značeńnia
Himnastka Mielicina Staniuta raskazała, što nie moža ŭładkavacca na pracu za miažoj. Usio tamu, što jana biełaruska.
«Učora ja atrymała dźvie admovy ŭ pryjomie na pracu praz moj biełaruski pašpart. My ŭžo vyśviatlali ŭmovy i hetak dalej, ale pakolki ja biełaruska, jany nie mohuć uziać mianie na pracu.
Jašče raz chaču skazać — bolšaść biełarusaŭ suprać vajny. U Biełarusi biełarusaŭ užo šmat hod nie čujuć. Našy hałasy nie byli pačutyja ni ŭ 2020-m hodzie, ni raniej, ni ciapier.
U 2020 hodzie ŭvieś śviet sačyŭ za masavymi pratestami napiaredadni i paśla prezidenckich vybaraŭ, Biełaruś stała krainaj mocnych žančyn, jakija byli lidarami pratestaŭ. Usie časopisy i haziety publikavali fotazdymki śmiełych biełarusak z kvietkami.
Pratesty ŭ Biełarusi byli i ŭ 2010, 2007, 2006, 2004, 2002 hadach i hetak dalej, i da taho padobnaje.
Ja biełaruska, i ja chaču być pačutaj», — emacyjna napisała ŭ Instahramie himnastka.
Mielicina patłumačyła «Našaj Nivie», što nie moža ahučyć nazvy kłubaŭ, jakija joj admovili, i padrabiaznaści, bo heta byli kanfidencyjnyja razmovy.
«Heta ŭžo nie maje značeńnia na fonie taho, što adbyvajecca z Ukrainaj. Ja da hetaha hatova. Heta toje, z čym usie sutyknucca, rana ci pozna», — skazała spartoŭka.
Heta sapraŭdy nie pieršy padobny vypadak, jaki ź joj zdaryŭsia za apošnija dni. Niadaŭna jaje zaprasili vystupić u hała-kancercie na mižnarodnaj arenie. A paśla Mielicina atrymała paviedamleńnie, što arhanizatary aceńvajuć nastupstvy, jakija moža mieć turnir, paśla apošniaha rašeńnia ES nakont spartoŭcaŭ z Rasii i Biełarusi. Paśla joj skazali, što spytajuć u Mižnarodnaj asacyjacyi himnastyki, ci zmoža jana vystupić, ale adkazu tak i nie pryjšło.
«Heta budzie tak. Jany nie buduć prahladać vašu bijahrafiju ci staronku ŭ instahramie, padtrymlivajecie vy ci nie vajnu, urad, hvałt i hetak dalej.
Jany prosta bačać vaš pašpart i nacyjanalnaść i prymajuć rašeńni.
Dla ich nie maje značeńnia, što ja stajała na druhim baku, padtrymlivała praŭdu i ludziej, straciła z-za hetaha pracu.
Prosta tamu, što ja biełaruska.
I viedajecie, što? Ja nie vyklučaju, što heta naša vina. Viedajecie, jak u sporcie, kali ty nie vyjhraŭ — ty zrabiŭ niedastatkova. Ci niešta jašče nie zrabiŭ.
Heta žachliva, ale heta ŭžo tak», — napisała Mielicina.
Čytajcie taksama:
Mielicina Staniuta: Kudy padzieŭsia zakon, jaki nas achoŭvaje
ANT źniała z efiru prahramu Mieliciny Staniuty. Usie ŭsio razumiejuć
Ciapier čytajuć
U Estonii aryštavany Aleh Maisiejeŭ, kažuć jaho znajomyja. Heta były kiroŭca Cichanoŭskaj, jaki z časam staŭ jaje zaciatym krytykam5
Kamientary