Maskva dacisnuła Łukašenku: jon zhadziŭsia padpisać pahadnieńnie ab KSAR ADKB. Ekanamičnyja vuzły na pieramovach u Sočy nie raźviazanyja. Piša ŭ svaim błohu na NN Alaksandr Kłaskoŭski.
Na pieramovach u Sočy 27 žniŭnia Łukašenka zrabiŭ čakanuju sastupku: u pryncypie zhadziŭsia padpisać pahadnieńnie ab KSAR ADKB. Dva prezidenty damovilisia paskoryć stvareńnie adzinaj sistemy supraćpavietranaj abarony. Miadźviedzieŭ pryjedzie ŭ Biełaruś na manieŭry «Zachad-2009».
Takim čynam, najbolšy prahres — u militarnaj śfiery. A voś finansava-ekanamičnyja vuzły raźviazać nie ŭdałosia.
Pavodle rasijskich krynic, biełaruski hość navat nie prasiŭ kredyty. I małočna-hazavyja bolki nibyta nie čapali. Praŭda, sam Łukašenka pastfaktum akazaŭsia bolej havarki. Ź jaho słoŭ vynikaje, što balučyja ekanamičnyja pytańni — nafta, haz, małako, pazyki — usio ž abmiarkoŭvalisia.
Inšaja reč, što parazumieńnie znajści, vidavočna, nie pašenciła. U vyniku Miadźviedzieŭ i Łukašenka pierakinuli hetuju prablematyku na ŭrady. Zahvazdka ž u tym, što ŭradoŭcy abiedźviuch krain pastajanna ŭpirajucca łbami mienavita ŭ niavyrašanaść palityčnych prablem. Začaravanaje koła.
Rasijskija krynicy admaŭlajuć, što na pieramovach 27 žniŭnia dyskutavałasia pytańnie ab pryznańni Abchazii z Paŭdniovaj Asiecijaj. Minski analityk Andrej Fiodaraŭ nie vieryć. Jon nahadvaje, što napiaredadni maskoŭskaja presa nahniatała mienavita hetaje pytańnie: čas, maŭlaŭ, pastavić jaho rubam. Premjer Pucin, zakranuŭšy hetuju temu 26 žniŭnia, taksama prazrysta namiaknuŭ: my, kaniečnie, nie ciśniem, ale ž Biełaruś — sajuźnica, jakaja atrymała bahata dapamohi…
Vyhladaje na toje, što
Łukašenka pajšoŭ na raźmien. Dobra, maŭlaŭ, padpišam damovu pra KSAR (jana ž ramkavaja i pakidaje mahčymaść ciahnuć ryzinu), ale vy nie prystaŭlajcie nož da horła z tymi kaŭkazskimi respublikami.
U vyniku i vaŭki sytyja, i kozy cełyja. Kramlu važna davieści da ładu svajo «antyNATA». Zachad ža stavicca da hetych hulniaŭ (uklučna z hrandyjoznaj vosieńskaj stralaninaj na palihonach) pabłažliva: Rasija ŭžo nie taja. A voś niepryznańnie Minskam Abchazii z Paŭdniovaj Asiecijaj Jeŭropa dy Vašynhton ceniać.
Heta adčyniaje novyja pierśpiektyvy ŭ supracy z MVF. Fond nieŭprykmiet staŭ dla Biełarusi kredytoram apošniaj nadziei. Jon adšpilvaje tranšu za tranšoj, adrozna ad Rasii, spraŭna, pad mienšy pracent i biez palityčnych umoŭ.
P.S. Sa słoŭ Łukašenki, rasijcy ŭ 2010 hodzie adkryjuć nam kredytnuju liniju na pabudovu AES. Ale toje jašče viłami pa vadzie pisana. Znoŭ ža, nieviadomyja ŭmovy. I narešcie, hetaja budoŭla stahodździa pahražaje jašče macniej pryviazać Biełaruś da Rasii.
P.P.S. A tym časam litoŭskija krynicy paviedamlajuć, što Łukašenka moža vybracca 16 vieraśnia ŭ Vilniu na Biełaruski ekanamičny forum. Rasija Rasijaj, ale akno ŭ Jeŭropu pakrysie prasiakajecca.
Ciapier čytajuć
Časam niečakanaja historyja biełaruskich himnaŭ: «My vyjdziem ščylnymi radami», «Pahonia», «Žyvie Biełaruś», «Radzima maja darahaja», «Mahutny Boža» (ź VIDEA)1212
Kamientary