Čamu ŭ Biełarusi zabaranili antyŭtopiju «1984»? Vy nie pavierycie ŭ samuju imaviernuju viersiju
Zabarona na prodaž «1984» adbyłasia adrazu paśla pahromu kniharni «Knihaŭka», dzie pradavaŭsia biełaruski pierakład hetaj knihi, i zatrymańnia Nasty Karnackaj, supracoŭnicy «Knihaŭki», jakaja kalekcyjanavała hety tvor na roznych movach.
Na fota vyšej — knihi Orueła z pryvatnaj biblijateki Nasty Karnackaj.
Znajomyja Karnackaj adznačajuć, što jana była fanatkaj tvorčaści Orueła i kalekcyjavała raman «1984» na roznych movach.
Surazmoŭcy «Našaj Nivy» vykazvajuć zdahadku, što HUBAZiK pry vobšuku adkryŭ dla siabie asartymient «Knihaŭki», novuju dla siabie litaraturu, što i vyklikała rašeńnie ab zabaronie. Viadoma, što HUBAZiK aktyŭna dyktuje, jakija vydańni i resursy «destruktyŭnyja». Ź niadaŭniaha času dastatkova rašeńnia adnaho Ministerstva ŭnutranych spraŭ, kab pryznać luby kantent zabaronienym ci niepažadanym.
Rasparadžeńnie ŭ kniharni pajšło 18 maja, praz dva dni paśla pieratrusu ŭ «Knihaŭcy».
Knihu źniali z prodažu ŭ dziaržaŭnych kniharniach, u pryvatnych sietkach jana pakul zastajecca ŭ asartymiencie. Miarkujučy pa hetym, rasparadžeńnie pajšło pa kanałach «Biełknihi», jakaja padparadkoŭvajecca Ministerstvu infarmacyi, a jano, u svaju čarhu, vykonvaje zahady z Administracyi prezidenta.
U raznaradcy na zabaronu fihuravali słovy ab «usich vydańniach» hetaj knihi. Miełasia na ŭvazie — jak biełaruskamoŭny, tak rasiejskamoŭny pierakłady.
Nahadajem, 16 maja u novaadkrytuju vydaviectvam «Januškievič» pryvatnuju kniharniu «Knihaŭka» pryjšła palityčnaja palicyja.
Hetamu papiaredničała stvareńnie zakaznych repartažaŭ z falsifikavanymi faktami ŭ TH-kanałach Azaronka i Hładkaj, jakija vykarystoŭvajucca śpiecsłužbami dla apraŭdańnia pahromaŭ.
Paśla vobšuku supracoŭnikaŭ «Knihaŭki» aryštavali — jany adbyvajuć administracyjny aryšt. Sotni adzinak litaratury vyniatyja.
Źviazanyja z orhanami telehram-kanały vinavaciać supracoŭnikaŭ u viadzieńni litaraturnych kanałaŭ i pierapiscy ź dziejačami demakratyčnych siłaŭ. Ciapier Nasta Karnackaja adbyvaje administratyŭny aryšt za «drobnaje chulihanstva» — typovy artykuł dla sfalsifikavanych palityčnych spraŭ. Artykuł vydaŭca Andreja Januškieviča nieviadomy, ale jon taksama atrymaŭ administratyŭny aryšt.
Źniaćcio z prodažu kłasičnaj antytatalitarnaj utopii, jakaja była zabaronienaja i ŭ SSSR, nie prajšło cicha, vyklikała vialiki rozhałas u hramadstvie. Pabačym, ci paśla hetaha Orueł vierniecca na palicy «Śvietača» i «Akademknihi».
Kamientary