Chvoruju na ankałohiju piensijanierku raździavali siłaj. Novyja detali suda pa spravie Aŭtuchoviča
Sud pa spravie «hrupy Aŭtuchoviča» idzie ŭ turmie Hrodna. Jak stała viadoma «Našaj Nivie», prykładna z tydzień tamu načalnik hrodzienskaj turmy syšoŭ u adpačynak. Kiravańnie ŭziaŭ na siabie adzin ź jaho namieśnikaŭ — i praviły stali jašče bolš biesčałaviečnymi.
Dniami źjavilisia šakujučyja padrabiaznaści z sudzilišča pa spravie Aŭtuchoviča: adnaho z abvinavačanych, invalida Uładzimira Hundara, prosta ŭ trusach prynieśli ŭ kletku i prykavali da jaje kajdankami. Mužčyna kryčaŭ i aburaŭsia, za što byŭ vydaleny.
Pa infarmacyi «Našaj Nivy» praz pryniźlivyja pracedury prachodziać usie abvinavačanyja.
Ciapier pierad pasiadžeńniami ŭsich abvinavačanych pa spravie Aŭtuchoviča zvyšpilna nadhladajuć. Źjaviłasia hetaje novaŭviadzieńnie jakraz paśla taho, jak načalnik syšoŭ u adpačynak.
Usich abvinavačanych vyvodziać z kamier pierad pasiadžeńniami i prymušajuć zdymać vopratku, navat trusy. Rabotniki turmy abšukvajuć, abmacvajuć ludziej, prahaniajuć ich praz ramku skaniera. U čakańni «pravierki» aholenych abvinavačanych trymajuć u kalidory. Mužčyn i žančyn «praviarajuć» asobna.
Mienavita praz heta pačaŭ pratestavać Uładzimir Hundar. Jon admoviŭsia raździavacca, za heta na adno z pasiadžeńniaŭ jaho prynieśli na rukach i pasadzili ŭ kletku. Mylic nie dali (Hundar invalid, były afhaniec, niama adnoj nahi).
U nastupny raz jon iznoŭ admoviŭsia — voś tady jaho prynieśli ŭ kletku prosta ŭ trusach i prykavali kajdankami.
Ale aburaŭsia raździavańniami nie tolki Hundar.
Pierad apošnim pasiadžeńniem admoviłasia raździavacca i davać rečy na pravierku i Halina Dzierbyš: jana piensijanierka, chvareje na ankałohiju. Tady ź jaje pačali ściahvać vopratku siłaj, padčas hetaha parvali majku žančyny. Na sudzie była bačna dzirka santymietraŭ dziesiać na baku.
Dzierbyš padała chadajnictva na pasiadžeńni: prasiła sudździu spynić hetyja pryniźlivyja raździavańni. Sudździa Fiłataŭ adkazaŭ: heta nie tyčycca spravy, źviartajciesia da kiraŭnictva turmy!
Darečy, vydalali z apošnich pasiadžeńniaŭ nie tolki Hundara.
Za niejkija «nie tyja» pytańni vydalili i Mikałaja Aŭtuchoviča. Praŭda, i jon, i Hundar źjavilisia na nastupnym pasiadžeńni — pryčym nichto nie chadajničaŭ ich viarnuć. Mužčyn prosta pryviali ŭ kletki.
Taksama viadoma, što abvinavačanaj Volzie Majoravaj na adnym z apošnich pasiadžeńniaŭ stała kiepska. Vyklikali doktara, jon pravieryŭ cukar, pakazała 6,6. Doktar skazaŭ — narmalna.
Žančynie vidavočna było kiepska, jana amal nie mahła siadzieć, za što pačuła ad sudździ Fiłatava: «Majorava, siadźcie narmalna! Nie paśmichajciesia!»
Na apošnich pasiadžeńniach vysłuchoŭvali śviedkaŭ pa spravie. Adnym byŭ były supracoŭnik KDB, «na dadzieny momant biespracoŭny», mužčyna ŭzrostam kala 40. Pracavaŭ u KDB z 2013-ha pa 2017-y, raskazvaŭ, što padčas słužby mieŭ apieratyŭnyja danyja pra Hundara: nibyta toj byŭ znajomy ź Siamionam Siamienčankam (ukrainski deputat, były kamandzir bataljona «Danbas» ZSU. — NN), jość navat fota z sacsietak.
Druhi śviedka — vykładčyk fizkultury ź Lidy. Jamu zadali pytańnie: jak paznajomiŭsia z Aŭtuchovičam?
Na što mužčyna adkazaŭ: «Ja i nie znajomiŭsia. Pračytaŭ u internecie, što jość taki pradprymalnik, zacikaviŭsia jaho historyjaj — i prosta dadaŭ jaho ŭ siabry ŭ fejsbuku».
Prakurorka pacikaviłasia: vy skidvali Aŭtuchoviču danyja na dvuch milicyjantaŭ ź Lidy?
Śviedka skazaŭ na heta: «Mikałaj spytaŭ, ci niama ŭ Lidzie cikavych milicyjantaŭ? A mianie dziejańni našych supracoŭnikaŭ pryvodzili ŭ žach. I ja prosta zahuhliŭ i kinuŭ Aŭtuchoviču adrasy i proźviščy dvaich milicyjantaŭ z sajta ci kanała «Doška hańby Lida». Byŭ na emocyjach».
Cikavy momant: za raspaŭsiud piersanalnych danych siłavikoŭ biełarusaŭ biaźlitasna sudziać, mnohija atrymlivajuć hody kałonii. Ale, vyhladaje, hety lidski fizruk paźbieh hetych nastupstvaŭ. Vysłuchaŭšy jaho pakazańni, sudździa skazaŭ: dziakuj, vy svabodnyja!
Ina Kulej: Milinkievič pieramoh śmierć, ale šlach da poŭnaha adužańnia niablizki4
Kamientary