Zachodnija ekśpierty: Čarnamorski fłot Rasii pieratvaryŭsia ŭ bierahavuju achovu
Vybuchi na rasijskich vajskovych bazach u Krymie i ataki ŭkrainskich bieśpiłotnikaŭ na štab Čarnamorskaha fłotu ŭ Sievastopali padryvajuć płany Rasii ŭ atacy na poŭdzień Ukrainy. Čarnamorski fłot pierastaŭ adyhryvać važnaje značeńnie ŭ zachopnickich płanach, kažuć vajskovyja analityki i čynoŭniki.
Razvał mocy fłotu adbyŭsia niečakana. Byŭ patopleny fłahmanski krejsier «Maskva» i jašče niekalki sudnaŭ, u vyniku čaho fłot pazbaviŭsia značnaj ahniavoj mocy. Rasijskim vojskam pryjšłosia pakinuć vostraŭ Źmiainy — nie tolki simvał ukrainskaha supracivu, ale i samuju blizkuju kropku da Adesy, a taksama płacdarm, ź jakoha možna było b padtrymać nastupleńnie.
9 žniŭnia na aeradromie Saki, bolš čym za 200 km ad pieradavych ukrainskich pazicyj, było źniščana vosiem ci dzieviać bajavych samalotaŭ. «Kali možna ŭdaryć pa Sakach i Sievastopali, heta ŭsio mianiaje, — skazaŭ The Wall Street Journal Džon Śpiensar, dyrektar pa vyvučeńni vajennych dziejańniaŭ u haradskich umovach Madison Policy Forum. — Hetyja ŭdary padryvajuć zabieśpiačeńnie, apieratyŭnaje kiravańnie i ŭ kančatkovym vyniku mahčymaści samaha Čarnamorskaha fłotu».
Pa słovach zachodniaha čynoŭnika, paśla ŭdaraŭ Čarnamorski fłot u asnoŭnym ujaŭlaje ź siabie fłatyliju dla bierahavoj abarony, jakaja zredku nanosić rakietnyja ŭdary. Paniesienyja straty taksama praktyčna pazbaŭlajuć Rasiju šancaŭ arhanizavać vysadku marskoha desantu ŭ Adesie, skazaŭ jon.
Apošnija ŭdary razam z strataj «Maskvy» prymusili fłot pierajści da abarončaj taktyki i trymacca krymskaha bieraha, zajaviła Ministerstva abarony Vialikabrytanii. Biaśpieku fłotu zabiaśpiečvali radary i samaloty, a pakolki ciapier jana padarvanaja, to vajenačalniki mohuć dumać pra toje, kab pierabazavać astatnija karabli kudyści jašče, ličyć Śpiensar.
Ciapier čytajuć
«Jana nie vyhladała ščyraj, była ŭ mascy». Paŭlučenka pra sustreču Kaleśnikavaj ź biełaruskimi žurnalistami23
Kamientary