Daradca prezidenta Litvy pra abmiežavańni dla biełarusaŭ: Padčas vajny heta nieabchodna
Hałoŭny daradca prezidenta Hitanasa Naŭsiedy ŭ pytańniach nacyjanalnaj biaśpieki Kiastucis Budrys kaža, što, pakolki vajna Rasii va Ukrainie praciahvajecca, Litva pavinna ŭvieści abmiežavańni na atrymańnie hramadzianami Rasii i Biełarusi hramadzianstva Litoŭskaj Respubliki, piša Delfi.
Pa słovach daradcy kiraŭnika krainy, heta treba, kab, kali ŭ nastupnym hodzie ŭ krainie budzie praviedzieny refierendum ab množnym hramadzianstvie, nie spatrebiłasia pašyrać koła vychadcaŭ z krain-ahresaraŭ, jakija majuć prava na nabyćcio hramadzianstva Litvy. Tamu, praciahnuŭ jon, nieabchodnaje bolš strohaje rehulavańnie.
«Takoje abmiežavańnie padčas vajny, kali Rasija i Biełaruś ažyćciaŭlajuć ahresiju suprać Ukrainy — nieabchodnaje, pakul u nas takaja situacyja, pakul jana nie źmianiłasia. Tut ja b u pieršuju čarhu zasiarodziŭsia na najbližejšych rašeńniach, jakija źviazanyja z vajnoj u rehijonie. My nie možam dazvolić sabie pašyrać koła asob z padvojnym hramadzianstvam z hetych dziaržaŭ», — skazaŭ K. Budrys.
Adnak daradca H. Naŭsiedy adznačyŭ, što ŭ doŭhaterminovaj pierśpiektyvie, mahčyma, pryjdziecca šukać rašeńni, jakija dazvolili b pierahledzieć prapanavanyja abmiežavańni. Spraścić praceduru atrymańnia hramadzianstva možna budzie tolki ŭ tym vypadku, kali situacyja ź biaśpiekaj u rehijonie istotna źmienicca, a Maskva spynić bajavyja dziejańni va Ukrainie.
«U doŭhaterminovaj pierśpiektyvie ŭ nas usio ž pavinny być praduhledžanyja miechanizmy dla pierahladu ŭsiaho hetaha, kali situacyja źmienicca, što vielmi i vielmi małavierahodna», — padkreśliŭ jon. Ciapier u Siejmie idzie abmierkavańnie prapanovy ministra ŭnutranych spraŭ Ahnie Biłatajcie i staršyni parłamienckaha kamiteta pa nacyjanalnaj biaśpiecy i abaronie Łaŭrynasa Kaščunasa prypynić pryjom zajaŭ hramadzian Rasii i Biełarusi i rašeńniaŭ pa ich adnosna hramadzianstva Litoŭskaj Respubliki. Pa słovach inicyjataraŭ, apošniaja prapanova pradstaŭlenaja paśla acenki značeńnia instytuta hramadzianstva i z metaj nie dapuścić atrymańnia hramadzianstva Litvy hramadzianami tych krain, jakija ŭdzielničajuć u rasijskaj ahresii suprać Kijeva.
«My jamu daviarajem». Čamu źnikłuju Mielnikavu zamianiŭ mienavita eks-vajskoviec Paciechin?1
Kamientary