Dziaŭčyna nabiła tatu, kab chadzić biaspłatna ŭ akvapark. Ale ŭ vyniku sistema dała zboj
Jość šmat hodnych siužetaŭ dla tatuiroŭki, ale Žanna vybrała łoha akvaparku — sonca, mora i ekskluziŭny podpis «Lebiadziny». Rekłamnuju vyjavu minčanka vybiła nie prosta tak: jana ŭdzielničała ŭ konkursie da dnia naradžeńnia akvaparku. U padarunak za śmiełaść atrymała prava ŭsio žyćcio naviedvać vodnyja horki biaspłatna. Va ŭsiakim razie, tak było abiacana. Radaść doŭžyłasia piać hadoŭ, a potym praviły źmianilisia. «Ja jašče žyvaja, tatuiroŭka na ciele. Ale akvapark admianiŭ svaje abaviazacielstvy, mianie nie puścili», — z kryŭdaj napisała ŭ Onliner.by redakcyju biełaruska.
Za pieramohu ŭ konkursie vydali siertyfikat. Ale damovy nie było
— Jak ja nadumała zrabić takuju tatuiroŭku? Na toj momant ja była ŭ dekrecie ź dziciom — sucelny dzień surka, — uspaminaje padziei minułych hadoŭ Žanna Barysievič. — Adnojčy brat padaryŭ mnie zaprašalnik u akvapark, kab ja mahła raźviejacca. Taho dnia ja sapraŭdy rassłabiłasia, mnie vielmi spadabałasia. Tamu, kali akvapark abjaviŭ konkurs z tatuiroŭkaj, ja była nie suprać paaktyŭničać. Mnoj ruchała cikavaść — a čamu b i nie?
Na ŭsialaki vypadak Žanna zachavała niekalki skrynšotaŭ ab umovach konkursu ŭ sacsietkach. Pradstaŭniki akvaparku nazyvali prapanovu z tatuiroŭkaj «łotam dla śmiełych» i sapraŭdy abiacali zabiaśpiečyć abaniemient «na ŭsio žyćcio».
Na praciahu piaci hadoŭ čytačka paśpiachova karystałasia vyjhryšam. Spačatku naviedvała akvapark biaspłatna razam z synam, a kali toj padros — stała kuplać dla dziciaci paŭhadavyja abaniemienty, sama ž pa-raniejšamu prachodziła svabodna, pakazvajučy tatu zamiest apłaty.
— Z sakavika pa žnivień my ŭ akvaparku zavisali dniami. Byvała takoje, što chadzili tudy pa try-čatyry razy na tydzień. Mnie zdajecca, nas tam viedali ŭsie dziaŭčaty na kasach i ratavalniki, jakim majo dzicio pastajanna addavała zhublenyja na dnie basiejnaŭ branzalety. Moj tvar ci nahu z tatuiroŭkaj ratavalnikam pakažy — jany navat u śnie mianie paznajuć, — zapeŭnivaje minčanka.
Sioleta ŭ sakaviku Žanna znoŭ kupiła synu paŭhadavy abaniemient i čarhovy raz źbirałasia pryśviacić dzień rełaksu. Adnak rabotniki admovilisia jaje ŭpuścić, spasłalisia na novyja praviły.
— Ja viarnułasia dadomu i stała šukać infarmacyju pra konkurs na sajcie akvaparku i ŭ sacsietkach, ale ŭsie spasyłki akazalisia niepracoŭnymi. Byccam ničoha i nie było… Pry hetym jość naviny pra tatu i biaspłatny ŭvachod u akvapark u ŚMI — naprykład, ad ahienctva «Minsk-Naviny».
Što kažuć u akvaparku?
Minčanka aformiła piśmovy zvarot na imia dyrektara akvaparku. U adkazie adznačana, što «na pradpryjemstvie «Akva-Minsk» adsutničajuć jakija-niebudź dakumienty, što rehłamientujuć praviadzieńnie konkursu «Tatuiroŭka z łahatypam akvaparku» 19 maja 2018 hoda». Zatoje nabyli moc i dziejničajuć novyja praviły naviedvańnia, a jany lhot nie praduhledžvajuć.
U liście taksama zhadana, što za piać hadoŭ prahrama InPoint, pry dapamozie jakoj pravodzicca rehistracyja i kantrol naviedvalnikaŭ akvaparku, ni razu nie zafiksavała Žannu Barysievič.
Dalej iduć kamientary nakont mahčymaha parušeńnia dziaržpradpryjemstvam «Akva-Minsk» dadzienaha im publičnaha abiacańnia. Sutnaść arhumientaŭ zvodzicca da termina «ździełka» i nieabchodnaści zaklučać jaje pamiž jurydyčnaj asobaj i hramadzianami ŭ piśmovaj formie. U advarotnym vypadku ŭmovy pryznajucca niesapraŭdnymi. Taksama list utrymlivaje pieralik vyklučeńniaŭ, kali vusnaja forma ździełki ŭsio ž mahčymaja, ale zrazumieć usie niuansy niepadrychtavanamu čałavieku składana.
U Minharvykankamie zrabili sprobu razabracca ŭ situacyi paśla taho, jak Žanna nakiravała tudy piśmovy zvarot. U adkazie minčancy znoŭ nahadvajuć pra toje, što nijakich dakumientaŭ, jakija rehłamientujuć praviadzieńnie konkursu, na pradpryjemstvie «Akva-Minsk» nie znojdziena. Damovy akazańnia pasłuh na rukach u dziaŭčyny taksama niama, tamu dapamahčy joj u hetaj situacyi moža tolki sud.
Niama damovy — niama pretenzij? Kamientar jurysta
Juryst, śpiecyjalist pa abaronie pravoŭ spažyŭcoŭ Ivan Rajkievič vyvučyŭ situacyju i prapanuje raskłaści jaje paetapna.
— Ci byŭ konkurs z tatuiroŭkaj? Tak, byŭ, pra heta jość paviedamleńni ŭ ŚMI (ab praviadzieńni konkursu havorycca i ŭ samim adkazie DP «Akva-Minsk» na zvarot ad 30.03.2023).
Ci było paznačana va ŭmovach publičnaha konkursu, što tatuiroŭka daje prava bieźlimitnaha naviedvańnia akvatoryi da taho času, pakul vyjava jość na ciele pieramožcy łota? Tak, było, pra što taksama zhadvajecca ŭ ŚMI.
Ci maje prava pradpryjemstva ŭ adnabakovym paradku źmianić umovy konkursu i pierastać vypłačvać uznaharodu pieramožcu? Nie, što niepasredna ŭstanoŭlena art. 928 Hramadzianskaha kodeksa Respubliki Biełaruś. U nazvanym vypadku pryniatyja akvaparkam novyja praviły naviedvańnia zabaŭlalnaha kompleksu «Lebiadziny» supiarečać raniej pryniatym rašeńniam ab praviadzieńni konkursu i vypłacie ŭznaharody.
Ci vykonvaŭ akvapark paśla konkursu ŭmovy, pavodle jakich dziaŭčyna z tatuiroŭkaj maje prava bieźlimitna naviedvać akvapark? Vykonvaŭ. Toje, što prachod dziaŭčyny ŭ akvatoryju nie fiksavali ŭ sistemie, — heta sumnieŭny arhumient, ličyć juryst.
Niepierakanaŭčym Ivan Rajkievič nazyvaje i tłumačeńnie, što ŭ akvaparku adsutničajuć patrebnyja dakumienty, a ź pieramožcam nie zaklučyli piśmovuju damovu.
— Heta adlustroŭvaje chutčej arhanizacyju pravavoj pracy na pradpryjemstvie. U dadzienaj situacyi heta nie mianiaje stanovišča spraŭ, pakolki dokazy faktyčnych abstavin znachodziacca nie tolki ŭ pakazańniach śviedak, ale i ŭ ŚMI.
Što atrymlivajecca ŭ suchoj rešcie? Faktyčna baki vykonvali ŭziatyja na siabie abaviazacielstvy i na praciahu piaci hadoŭ čałavieku davaŭsia biaspłatny prachod na terytoryju akvaparku. Z ulikam hetych abstavin, pakazańniaŭ śviedak i dokazaŭ u ŚMI ja rekamienduju minčancy źviartacca ŭ sud ź iskavaj zajavaj ab abaronie jaje pravoŭ jak pieramožcy konkursu. Jość taksama šaniec urehulavać sprečku ŭ dasudovym paradku, ź minimalnymi časovymi i finansavymi stratami dla abodvuch bakoŭ — jak samastojna, tak i z dapamohaj miedyjatara (prymiryciela).
Vialikaja hutarka ź Lesiaj Rudnik pra seksizm, muža-reślera, zarobak doktarki navuk u Šviecyi, apazicyju i pamyłku Jeŭrasajuza19
Kamientary
https://dck8xvlq18iei.cloudfront.net/314850
Kłaśsika dlinnych obiazatielstv.