Prafiesar Ilcham Alijeŭ pra armian
Prezident Azierbajdžanu Ilcham Alijeŭ staŭ hanarovym prafiesaram Biełaruskaha dziaržaŭnaha univiersitetu.
Prezident Azierbajdžanu Ilcham Alijeŭ staŭ hanarovym prafiesaram Biełaruskaha dziaržaŭnaha univiersitetu.
U prahramie vizitu kiraŭnika Azierbajdžana ŭ Minsku značyŭsia vystup pierad vykładčykami i studentami BDU. Sustreča adbyvałasia ŭ rektaracie VNU, na Babrujskaj, 5a. Žurnalistaŭ paprasili pryjści na mierapryjemstva za hadzinu.
Achoŭniki z racyjami i sabakam pilna dahladali ŭsie rečy. A na pieršym paviersie toŭpilisia dziaŭčaty ŭ nacyjanalnych strojach, jakija musili sustrakać vysokaha hościa.
Padymajusia na druhi pavierch. Adrazu nasustrač iduć rektar BDU Siarhiej Abłamiejka i ministr adukacyi Alaksandr Radźkoŭ.
Zala, dzie adbyvajucca pasiadžeńni Vučonaj rady, raźličanaja na 120 čałaviek. Pacichu źbirajucca azierbajdžanskija studenty ŭ bliščastych kaściumach i navaksavanych čaravikach. Našy studenty z fakultetu mižnarodnych stasunkaŭ. Usie vokny byli staranna začynienyja, ci zaciahnutyja firankami.
Doktar palityčnych navuk Ilcham Alijeŭ zachodzić u zalu ŭ supravadžeńni ŭsio tych ža Abłamiejki i Radźkova. Rektar VNU na pravach haspadara zajmaje miesca pasiaredzinie, a prezident ź ministram raźmiaščajucca pa bakach.
Pieršym słova biare mienavita Siarhiej Abłamiejka, jaki paviedamlaje, što
30 kastryčnika było pryniataje rašeńnie nadać sp.Alijevu zvańnie hanarovaha prafiesara BDU. Navinu prysutnyja sustrakajuć apładysmientami. Lideru Azierbajdžanu ŭručyli mantyju i dypłom, paśla čaho paprasili zrabić nievialikuju pramovu.
Alijeŭ pačaŭ z taho, što za apošnija hady adnosiny pamiž Biełaruśsiu i Azierbajdžanam atrymali vialiki pośpiech. Jon pryvioŭ prykład zavodu pa zborcy traktaroŭ, što zapracavaŭ u kaŭkazskaj Hiandžy. «Ja vielmi zadavoleny tym, jak raźvivajucca našy adnosiny. My bačym kankretnyja vyniki i dakładnuju pierśpiektyvu našaha supracoŭnictva», — kaža I.Alijeŭ.
Prezident zaznačyŭ, što za apošni čas jahonaja kraina prajšła šlach madernizacyi. «Ciapier Azierbajdžan — samadastatkovaja kraina», — kazaŭ z kafiedry prafiesar.
Pa słovach Alijeŭ, sioleta Azierbajdžan źjaŭlajecca adnoj ź niamnohich krain, dzie praciahvajecca ekanamičny rost, a ŭ krainie pravodziacca libieralnyja reformy ŭ halinie ekanomiki.Adnym z hałoŭnych dasiahnieńniaŭ jon nazvaŭ ekanamičnuju biaśpieku i niezaležnaść Azierbajdžanu, jakaja stała mahčymaja dziakujučy vialikim zapasam nafty i hazu.
Značnaja častka pramovy Alijeva była pryśviečanaja kanfliktu Azierbajdžana i Armienii ŭ Nahornym Karabachu. «Hety kanflikt byŭ nam naviazany. Sieparatysckija tendencyi pry dapamozie armian pryviali da vajny, da etničnych čystak azierbajdžancaŭ.
Bolš za 1 miljon maich suajčyńnikaŭ byli vymušanyja pakinuć svaje damy. Kala 20% azierbajdžanskaj terytoryi zaraz akupavanyja. Tam razburana ŭsio: našy škoły, balnicy, mohiłki, miačeci», — kaža Ilcham Alijeŭ.
«Była parušanaja terytaryjalnaja cełasnaść krainy. My pretendujem tolki na adnaŭleńnia spraviadlivaści, zakonnaści, pastanovaŭ AAN. Armianie kažuć pra samavyznačeńnie miascovaha nasielnictva. Ale kali b jany chacieli stvaryć dziaržavy va ŭsich miescach, dzie žyvuć armianie, to atrymałasia b u śviecie nie mienš za 20 armianskich dziaržaŭ. My pierakananyja, što vyrašeńnie hetaha kanfliktu — heta pytańnie času», — zaznačyŭ hość.
Alijeŭ padkreśliŭ, što paśla razvału SSSR Azierbajdžan byŭ najmienš padrychtavany da niezaležnaści. «Ciapier ža my majem stabilnuju, pradkazalnuju, dynamičnuju dziaržavu, jakaja daje ludziam mahčymaść samarealizavacca va ŭsich śfierach.
U Azierbajdžana ciapier šmat siabroŭ u śviecie, u tym liku Biełaruś», — tak skončyŭ Alijeŭ svoj vystup.
Kamientary