Buduć sudzić udzielnikaŭ machlarskaha koł-centra, jaki śpiecyjalizavaŭsia na rasijanach

Pavodle materyjałaŭ śledstva, udzielniki arhanizavanaj hrupy stvaryli šmatuzroŭnievuju schiemu padmanu. U internecie jany raźmiaščali resursy ź iłžyvaj infarmacyjaj pra mahčymaść atrymlivać vysokija prybytki ad apieracyj na rynku kaštoŭnych papier. Svaju dziejnaść jany maskiravali pad pracu realna isnujučych mižnarodnych kampanij, źviazanych ź biržavymi apieracyjami.

Złamyśniki nabyvali na śpiecyjalizavanych sajtach kantaktnyja danyja ludziej, jakija cikavilisia inviestycyjami. Paśla jany telefanavali patencyjnym achviaram, viali ź imi elektronnuju pierapisku, aŭdyja– i videarazmovy, vykarystoŭvajučy vydumanyja imiony i pradstaŭlajučysia supracoŭnikami fiktyŭnych brokierskich kampanij.

Padčas razmoŭ jany ŭstaloŭvali psichałahičny kantakt, uvodzili ludziej u zman nakont sapraŭdnych metaŭ i pierakonvali ich, što z dapamohaj «śpiecyjalistaŭ» možna harantavana atrymać abo značna pavialičyć prybytak ad inviestycyj.

Kab stvaryć uražańnie sapraŭdnaj dziejnaści, paciarpiełym dasyłali padroblenyja elektronnyja dakumienty: damovy na brokierskaje absłuhoŭvańnie, licenzii na brokierskuju dziejnaść, harantyjnyja listy, strachavyja paśviedčańni i roznyja inviestycyjnyja dakumienty.

Zatym ad ludziej atrymlivali kopii pašpartoŭ i inšych asabistych dakumientaŭ, a taksama infarmacyju pra ich finansavyja mahčymaści. Usie hetyja źviestki sistematyzavalisia i zanosilisia ŭ CRM-sistemy, paśla čaho mahli vykarystoŭvacca inšymi ŭdzielnikami schiemy.

Achviaram davali spasyłki na padstaŭnyja sajty, dapamahali zarehistravacca i stvarać tam ulikovyja zapisy z depazitnymi rachunkami. Ludziam pakazvali nibyta pracoŭnyja mahčymaści fiktyŭnych handlovych płatformaŭ, vučyli karystacca ŭlikovymi zapisami i stvarali ŭražańnie, što jany sapraŭdy mohuć kiravać svaimi depazitami, papaŭniać ich i vyvodzić hrošy.

Paśla ludziej uciahvali ŭ imitacyju biržavych apieracyj. Złamyśniki faktyčna kiravali ich dziejańniami na padstaŭnych płatformach i pakazvali fiktyŭny rost prybytku. Dla vymańvańnia novych pieravodaŭ vykarystoŭvalisia roznyja padstavy: pieršapačatkovy depazit, nieabchodnaść papaŭnieńnia rachunku dla dalejšaha handlu, a taksama nibyta abaviazkovyja pracedury vieryfikacyi, listynhu, akredytacyi, klirynhu, strachavańnia i inšyja.

Nasamreč pakazany achviaram «zarobak» byŭ tolki stvoranaj z dapamohaj śpiecyjalnaha prahramnaha zabieśpiačeńnia iluzijaj. Złamyśniki imitavali pracu biržavych servisaŭ, stvarali fiktyŭnyja hrafiki i pakazvali rost kapitału, całkam kantralujučy infarmacyju, jakuju čałaviek bačyŭ na ekranie.

Skradzienyja hrošy pieravodzilisia na rachunki, jakija kantralavalisia ŭdzielnikami arhanizavanaj hrupy. Jany sami rasparadžalisia hetymi srodkami, u tym liku vykarystoŭvali ich dla apłaty roznych pasłuh, nieabchodnych dla pracy machlarskich koł-centraŭ, a taksama mierapryjemstvaŭ dla «zhurtavańnia kalektyvu».

Dla prykryćcia złačynnaj dziejnaści i stvareńnia bačnaści lehalnaj pracy ŭdzielniki schiemy zarehistravali ŭ Biełarusi niekalki subjektaŭ haspadarańnia, arandavali ofisy, nabyli kampjutarnuju techniku, srodki ananimizacyi, IP-telefaniju, inšyja techničnyja pryłady i prahramnaje zabieśpiačeńnie. Novych supracoŭnikaŭ jany šukali praź śpiecyjalizavanyja sajty vakansij, a sumoŭi ŭ niekatorych vypadkach pravodzili z vykarystańniem palihrafa.

U krasaviku 2025 hoda siłaviki spynili dziejnaść hetaj hrupy. Pakolki złačynstvy mieli mižnarodny charaktar, dla rasśledavańnia źviazanych pamiž saboj spraŭ była stvorana sumiesnaja śledča-apieratyŭnaja hrupa z supracoŭnikami MUS Rasii.

Usiaho pa spravie ŭstanoŭleny 82 paciarpiełyja, pieravažna ludzi stałaha i pažyłoha ŭzrostu. Ahulnaja suma naniesienych im strat pieravysiła 2 miljony rubloŭ. Dla zabieśpiačeńnia kampiensacyi škody na majomaść abvinavačanych nakłali aryšt prykładna na 2 miljony rubloŭ. Akramia taho, sami abvinavačanyja ŭžo kampiensavali bolš za 140 tysiač rubloŭ.

28 kiraŭnikam i ŭdzielnikam arhanizavanaj hrupy va ŭzroście ad 23 da 56 hadoŭ vystavili abvinavačańni pavodle častki 4 artykuła 209 Kryminalnaha kodeksa Biełarusi — za machlarstva, učynienaje arhanizavanaj hrupaj u asabliva bujnym pamiery. Pavodle sankcyi prakurora ŭsie jany ŭziatyja pad vartu.

Rasśledavańnie kryminalnaj spravy zavieršana, a jaje materyjały pieradadzienyja prakuroru dla nakiravańnia ŭ sud.

• 0
• 0
• 0
• 0
• 0
• 0
• 0
• 0