Dźmitryj Kruty raspavioŭ, jakija abmiežavańni na rasijskim rynku chočuć likvidavać biełaruskija ŭłady dla svaich vytvorcaŭ
Pavodle acenki pasła Biełarusi ŭ Rasii Dźmitryja Krutoha, Biełaruś «vydatna» handluje z Rasijaj: ekspart pieravyšaje impart, ale ŭ toj ža čas, zachoŭvajucca niekatoryja barjery. Ciapier abmiarkoŭvajecca śpis tavaraŭ, dla jakich treba atrymać dostup na rasijski rynak, kab nie było abmiežavańniaŭ.
Kruty raspavioŭ, što śpis tyčycca pramysłovaj hrupy tavaraŭ — takich viadomych pazicyj jak traktary, kambajny, hruzaviki ŭsich vidaŭ, pasažyrskaja technika.
Pavodle jaho słoŭ, heta nie śpis pramych abmiežavańniaŭ dla prodažu ŭ Rasii, a śpis dostupu da lhotnych finansavych lizinhavych prahram.
Pasoł rastłumačyŭ: «Rasijskaje pramysłovaje zakanadaŭstva apošnich, napeŭna, 7-8 hadoŭ składzienaje takim čynam, što adpaviednyja subsidyi mohuć atrymać tolki vytvorcy, jakija majuć vialikija zakončanyja bujnyja vytvorčaści ŭ samoj Rasii. Tyja rasijskija technałahičnyja apieracyi abo navat kampanienty, jakija vykarystoŭvajucca ŭ Biełarusi dla finalnaj zborki, jany nie zaličvajucca ŭ hetuju sistemu subsidziravańnia, i naša pradukcyja z-za hetaha prosta nie moža ŭdzielničać u hetych prahramach. Jana prosta fizična na samym starcie nie moža tudy patrapić. Heta pravavyja abmiežavańni», — ličyć jon.
Kruty śćviardžaje: biełarusy nie patrabujuć subsidyi dla vytvorcaŭ.
«My chočam, kab byli roŭnyja ŭmovy pa dostupie da subsidyj dla pakupnikoŭ, dla spažyŭcoŭ našaj techniki. Niešta padobnaje na tyja ekspartnyja instrumienty, jakija vykarystoŭvajem my sami dla, dapuścim, pakupki rasijskaj techniki i prodažu ŭ Biełarusi», — havoryć jon.
«Heta samaje žyvoje i samaje vostraje, što idzie ciapier», — skazaŭ jon.
Akramia taho, Kruty paskardziŭsia na paralelny impart i «niezrazumiełuju cenavuju palityku», praz što našy vytvorcy adčuvajuć vielmi žorstkija ŭmovy kankurencyi. Heta tyčycca nie tolki pramysłovaj pradukcyi, sielhasmašynabudavańnia, pasažyrskaj techniki, ale i bytavoj techniki.
«Hetaha być nie pavinna. Uličvajučy ŭmovy i charaktar adnosin, jakija skłalisia na hety momant pamiž našymi krainami, i hetyja pytańni pavinny apieratyŭna zdymać», — skazaŭ Kruty.
Usiaho ž u śpisie na ŭzhadnieńnie z Rasijaj kala 30 narmatyŭna-pravavych aktaŭ.
Ciapier čytajuć
18‑hadovy kursant Vajskovaj akademii ź Lachavič nikomu ničoha nie skazaŭ, zabraŭ dakumienty i pajechaŭ vajavać za Rasiju. Ciapier pa im płačuć51
Kamientary