Hihanckija kamiennyja siakiery, jakim 300 tysiač hadoŭ, azadačyli archieołahaŭ

Pad čas raskopak u hrafstvie Kient na terytoryi, adviedzienaj dla budaŭnictva Marskoj akademii, archieołahi znajšli kala 800 kamiennych pryładaŭ pracy i artefaktaŭ u adkładach lednikovaha pieryjadu, jakim kala 300 tysiač hadoŭ.

Siarod ich, akramia zvyčajnych ručnych siakieraŭ i kremnijevych adščepaŭ, byli dźvie ručnyja siakiery niezvyčajna vialikich pamieraŭ. Pra svaje znachodki vučonyja raskazali ŭ navukovym artykule ŭ Internet Archaeology.

Adna z znachodak maje pamier 22 sm. Druhaja — 29,5 sm, ciapier heta samaja vialikaja z padobnych znachodak. Abiedźvie znachodki majuć charakternuju formu z doŭhim i tonka apracavanym vastryjom i bolš toŭstaju hrušapadobnaju asnovaju.

Ručnyja siakiery ad trochvuholnaj da hrušapadobnaj formy vyrablalisia z kremieniu i inšych drobnaziarnistych parod i byli ŭniviersalnaj pryładaj staražytnych ludziej na praciahu sotniaŭ tysiač hadoŭ: imi karystalisia Homo erectus, Homo heidelbergensis, a taksama nieandertalcy.

Pa słovach archieołahaŭ, znojdzienyja ručnyja siakiery nastolki vialikija, što ciažka ŭjavić, jak možna było ich trymać ci vykarystoŭvać. Vučonyja miarkujuć, što takija pryłady vykarystoŭvali niejkim asablivym čynam. Naprykład, kłali na ziamlu, a zatym apuskali štości na ich, a nie naadvarot.

Archieołahi majuć i inšuju hipotezu. Jana zaklučajecca ŭ tym, što hetyja «hihanckija ručnyja siakiery» mahli mieć niejkuju simvaličnuju funkcyju, jakaja zaklučałasia ŭ demanstracyi siły ci majsterstva.

Zahadkaj zastajecca i vid staražytnych ludziej, jakomu takija pryłady naležali. Z čysta chranałahičnaha punktu hledžańnia ich možna datavać rańnim pieryjadam raśsialeńnia nieandertalcaŭ u Vialikabrytanii. Adnak, mahčyma, jany naležali i bolš rańniamu vidu — Homo heidelbergensis.

U artykule adznačajecca, što hetyja znachodki hihanckich siakier na terytoryi Anhlii ŭ dalinie Mieduej i rehijonie Temzy nie pieršyja. Ale apošniaja vyznačajecca svaim asabliva vializnym pamieram. Jaje znajšli ŭ chodzie bujnamaštabnych raskopak, što daje mahčymaść atrymać bolš infarmacyi pra žyćcio jaje stvaralnika.

Navukovy supracoŭnik instytuta archieałohii Univiersiteckaha kaledža Łondana Met Poŭp (Matt Pope) śćviardžaje:

«Raskopki dali nam niejmavierna kaštoŭnuju mahčymaść vyvučyć, jak raźvivaŭsia ŭvieś łandšaft lednikovaha pieryjadu bolš za čverć miljona hadoŭ tamu. Prahrama navukovaha analizu ciapier dapamoža nam zrazumieć, čamu heta miesca było važnaje dla staražytnych ludziej i jak kamiennyja artefakty, u tym liku «hihanckija ručnyja siakiery», dapamahli im adaptavacca da vyklikaŭ ledavikovaha pieryjadu».

Ciapier daśledčaja hrupa pracuje nad identyfikacyjaj i vyvučeńniem znojdzienych artefaktaŭ, kab lepš zrazumieć, chto ich stvaryŭ i dla čaho jany vykarystoŭvalisia.

Čytajcie jašče:

Vučonyja znajšli samy staražytny nadpis, zrobleny kirylicaj

Draŭlany fałas zmusiŭ inakš pahladzieć na seksualnaje žyćcio staražytnych rymlan

Archieołahi rehularna znachodziać asimietryčnyja kości dla hulni časoŭ Rymskaj impieryi. Ale čamu jany takoj formy?

• 25
• 0
• 4
• 2
• 9
• 5
• 4
• 0