U Minsku buduć sudzić 15-hadovaha padletka za «vymahańnie». Vierahodna, heta brat administratara pratesnaha kanała čyhunačnikaŭ
Prakuratura horada Minska nakiravała ŭ sud kryminalnuju spravu ŭ dačynieńni da 15-hadovaha minčuka, jakoha abvinavačvajuć u vymahańni hrošaj u šaścikłaśnika. Ale heta nie zvyčajnaja kryminałka, u hetaj spravie jość važny niuans.
Jak śćviardžaje prakuratura, vymahańnie praciahvałasia z krasavika pa listapad 2022 hoda. Minski padletak nibyta nieadnarazova patrabavaŭ u 12-hadovaha znajomaha addać jamu hrošy — ad 25 da 1500 rubloŭ. Pry hetym pahražaŭ hvałtam, a taksama biŭ pa hałavie, rukach i nahach. Akramia taho, pałochaŭ tym, što ahučyć «źviestki, jakija chłopčyk chacieŭ zachavać u tajamnicy».
«Spačatku abvinavačvany vyrašyŭ «pahavaryć» z paciarpiełym kala kramy, paśla čaho staŭ sistematyčna padychodzić da jaho ŭ škole na pierapynkach. Časam takija «razmovy» prachodzili ŭ prysutnaści inšych chłopcaŭ», — raspaviali ŭ prakuratury.
Šaścikłaśnik, jak śćviardžajecca, tryvaŭ ździeki da momantu, pakul kryŭdziciel čarhovy raz jaho nie šturchnuŭ, i potym raspavioŭ pra ŭsio piedahohu.
Ciapier 15-hadovaha padletka abvinavačvajuć pa č. 2 art. 208 KK — «Vymahańnie, ździejśnienaje z užyvańniem hvałtu, nie niebiaśpiečnaha dla žyćcia i zdaroŭja paciarpiełaha». Jon znachodzicca pad vartaj.
Zdavałasia b, heta zvyčajnaja kryminalnaja sprava bieź nijakaj palityčnaj padkładki. Ale padobna da taho, što palityčnaja matyvacyja tut jość, bo ŭsio śviedčyć pra toje, što havorka idzie pra 15-hadovaha Arcioma Vajciachoviča. Heta małodšy brat administratara telehram-kanała «Biełaruskaja supolnaść čyhunačnikaŭ».
Siłaviki patrabavali, kab byŭ vydaleny pratesny kanał čyhunačnikaŭ, u abmien na vyzvaleńnie padletka. Padrabiazna pra heta raskazvaŭ sam administratar kanała Siarhiej Vajciachovič u intervju «Našaj Nivie» ŭ lutym hetaha hoda.
Pa hetym artykule padletku pahražaje da 10-ci hadoŭ źniavoleńnia.
Paśla aryštu Arcioma try dni trymali ŭ izalatary na Akreścina. Da jaho nie puskali ni baćkoŭ, ni advakata. Potym adpravili ŭ RNPC psichičnaha zdaroŭja («Navinki»).
Ciapier Arcioma Vajciachoviča ŭtrymlivajuć na Vaładarcy.
Ciapier čytajuć
Što viadoma pra zatrymanych radyjoamataraŭ, jakim pahražaje až da rasstrełu15
Kamientary