Azaronak pračytaŭ lekcyju ŭdzielnicam «Mis Biełaruś» i nazvaŭ patrabavańnie da budučaj žonki
Jon nie pieršy prapahandyst, jakoha pryviali da dziaŭčat.
Konkurs pryhažości «Mis Biełaruś» arhanizoŭvaje Nacyjanalnaja škoła pryhažości razam z telekanałam ANT. Padčas padrychtoŭki da finału dla ŭdzielnic ładziać roznyja sustrečy. Prychodziŭ da ich Vadzim Hihin, jaki ciapier uznačalvaje Nacyjanalnuju biblijateku, pryviali i prapahandysta Ryhora Azaronka.
Toj pračytaŭ dziaŭčatam lekcyju pra historyju i ciapierašniuju palityčnuju situacyju. A paśla padzialiŭsia svaim staŭleńniem da biełaruskaha konkursu pryhažości:
«My bačym, va ŭsim śviecie pierakručvajecca paniaćcie pryhažości, pierakručvajecca paniaćcie normy, pierakručvajecca ŭsia estetyka, jany ŭsie tam stracili rozum za miažoj Buha. I voś toje, što ŭ Biełarusi zachoŭvajecca naša razumieńnie, kupałaŭskaje, kołasaŭskaje, puškinskaje razumieńnie pryhažości, kachańnia, svabody, jak pra heta pisali našy paety, prosta cudoŭna».
U Azaronka spytali, pa jakim kryteryi jon budziecie vybirać sabie žonku.
«Treba, kab u jaje było stolki ž sankcyj, kolki ŭ mianie», — skazaŭ prapahandyst.
Adna z kankursantak była ŭ mierčy ad Łukašenki — cišotcy ź jaho cytataj.
Udzielnicy «Mis Biełaruś» minułych hadoŭ paśla konkursu nie raz supravadžali Łukašenku na aficyjnych mierapryjemstvach i balach. Ciapier, naprykład, jaho častaj spadarožnicaj stanovicca 20-hadovaja Nastaśsia Kazyryckaja, finalistka «Mis Biełaruś».
Ciapier čytajuć
Chočacie žyć doŭha — šukajcie rajon z narmalnymi drevami. Navukoŭcy vyśvietlili, što drevy ratujuć ad infarktaŭ, a hazony mohuć navat naškodzić zdaroŭju22
Kamientary